Burgemeesters en raad van Groningen verklaren, dat Aeylike Speleman, Dedeke, zijn vrouw, en heer Wicbolt Frijdema, bisschop van Pherae, Rolefmagoed te Zuidwolde aan Gherd Entes hebben verkocht en overgedragen.

Wy, borghermestere ende raed van Groninghen, bekennen ende betughen met dezen openen breve, dat vor ons
ziin ghekomen Aeylike Speleman ende Dedeke, ziin wiif, ende her Wicbolt Frydema, biscop to Fere, ende becanden ,
dat se hebben vercoft Gherde Entes ende zinen erfghenamen een steenhues met ziner hofstede ende een holten hues met ziner hofstede ende tsoventich graze landes, de umme dat vors. hues gheleghen ziin met horen tobehoren ende met alre heerlicheyt ende rechte, de vallen ende horen up de vors. husinghe,
heminghe ende erve met al horen tobehoren, van weliken husinghen, heminghen ende erve vors. Aeyliken ende Dedeken vors. tobehoerd de dredeel ende her Wicbolde vors. dat vyerde deel. Ende des so heft her Wicbolt vors. ghelovet Gherde vors. ende sinen erfghenamen dat vors. vyrendeel v[an] den vors. husinghen, heminghen ende erve met zinen tobehoren vrij to waren van alre ansprake ende bysunder[lin]ghe van alsulker ansprake, als Wicbolt Erhorn, ziin neve, daerup mach to spreken hebben. Ende des so hebben Eylike, Dedeke ende her Wicbolt vors. upghedraghen Gherde vors. ende sinen erfghenamen de vors. husinghe, heminghe ende erve met sinen tobehoren vrij ende quiit met allen rechte ende eghendome ewelik[en] to bruken ende to besitten, to setten ende to verkopen ende zinen vryen willen mede to done. Deze vors. husinghe, heminghe ende erve ziin gheleghen to Zuedwolde ende is ghehe[t]en Rolefmagued. Ende vor dit vors. gued becande Gherd vors., dat he hevet weder overgheven ende upghedragen Aeyliken [ende] Dedeken vors. een hues met ziner hofstede ende met sinen tobehoren, dat gheleghen is in Groninghen int weste van Botterincporte tegen der stades mure by Berent Slochters erve, dat int weste leghet ende Gherdes erve vors., dat int oeste leghet, vrij ende quiit to bruken ende to besitten to Ayliken ende to Dedeken live vors., dat is alsolanghe als enich van tween levet. Ende Gherd vors. ende sine erfghenamen zullen Eyliken ende Dedeken [vor]s. dat [vo]rs. hues gans ende dichte holden, alsolanghe als enich van hem beyden levet. Ende na hore beyder doed sal dat vors. hues ende stede wederkomen up Gherde vors. ende sine erfghenamen. Voerd so becande Gherd vors., dat hie daerto gheven sal Eyliken, Dedeken ende her Wicbolde vors. seshondert Groningher scilde payments als in Groninghen ganc ende gave is. Ende des sal Gherd betalen hondert gulden to Medewinter naestkomende in den vijer hilghen daghen ende dat ander ghelt to betalen daerna, so waneer her Wicbolt vors. wederkomet van Colne van siner bedevaerd ende her Wicbolt Gherde vors. dat vors. vyrendeel guedes ghevryet hevet van Wicbolde sinen neven vors., so mach elc dan nemen van den vors. ghelde, des hem met rechte toboren mach. Dat orkunde wy met onser stad seghele. Ghegheven in den jaer ons Heren dusent vyerhondert ende dre up sente Thomasavent, do Evert Sickinc, Frederic van Arlo, Alberd Wicbolts ende Coppiin Jarighes borghermestere waren onser stad .

x

x

Fonds	Oorkondenboek Groningen en Drenthe
Nr	1165
Olim	Naar het origineel in het rijksarchief te Groningen (Reg. 1403, no. 9), hoog 17,5, breed 25,8 cm.
Jaar	1403
Datumcode	vThome

x

x

x

Commentaar	Aan het stuk hangt het gewone zegel van de stad Groningen met contrazegel.

x

Materiaal	papier

x

Edities	P.J. Blok e.a., Oorkondenboek van Groningen en Drente, II (Groningen 1899), nr. 1165.