| Nummer:oub0025 | Datum:Köln, 23. März 1253 | Overlevering:Editie | Vindplaats:Ostfriesisches Urkundenbuch, I, S. 18, nr. 25 |
König Wilhelm belehnt nach Verzichtleistung Walram's von Montjoie und seiner Gemahlin Jutta den Bischof Otto von Münster mit den friesischen Gütern, welche Jutta's Vater Graf Otto von Ravensberg vom Reiche zu Lehen trug (Vgl. oub0017)
Wilhelmus Dei gratia Romanorum rex semper augustus universis sacri imperii fidelibus presentem paginam inspecturis gratiam suam ac omne bonum. Illustris benignitas, eternorum intuitus et excellentie regalis largitas ad promotiones ecclesiasticas multimode nos invitant. Regius enim ex hoc honor intenditur et acquiritur largiflua divine propitiatio maiestatis, ubi ecclesie Dei muneribus ditate principum et libertatibus votivis donate, favore specialis gratie confoventur. Hinc est quod nos ad interventum venerabilium domini H(ugonis) tituli sancte Sabyne presbyteri cardinalis apostolice sedis legati, C(onradi) Coloniensis archiepiscopi et H(einrici) Leodiensis electi, de providentia consilii nostri, comitatum et universa bona infra Frisiam et extra sita, que nobilis vir Otto comes de Ravensbergh tenuit de manu imperii titulo feodali, et que nobis per liberam resignationem Walrami de Monzoye tam pro se, quam pro Jutta uxore sua, ad quam dicta bona fuerant iure hereditario devoluta, quam etiam pro omnibus heredibus dicte Jutte, omni iuri quod sibi nomine dicte uxoris sue in prefatis bonis competebat ex quacunque causa renunciantis simpliciter coram nobis, legitime vacaverunt, venerabili Ottoni Monasteriensi episcopo dilecto principi nostro et sancto Paulo et eiusdem successoribus in perpetuum infeodamus et concedimus, a nobis et imperio iure feodali perpetuo possidenda, et eis bona ipsa auctoritate regalis culminis confirmamus. Testes qui interfuerunt sunt hii: legatus, Coloniensis et Leodiensis predicti, Symon Paderburnensis episcopus, Th. de Clive, W. de Juliaco, W. et O. de Nassowe, Adulfus de Monte, A. de Waldeke, Engelbertus de Marca et Conradus de Retbergh comites et W. dux de Lemburgh et alii quam plures. Datum Colonie X. Kal. Aprilis, Indict. undecima, anno Domini Mo CCo Lo tertio.
