| Nummer:oub0144 | Datum:Den Haag, 9. April 1381 | Overlevering:Editie | Vindplaats:Ostfriesisches Urkundenbuch, I, S. 121, nr. 144 |
Ocko von Brokmerland und Auricherland überträgt dem Herzog Albrecht von Baiern alle seine namentlich aufgeführten ostfriesischen Besitzungen, um dieselben als Erblehen zurück zu erhalten.
Allen den ghenen, de desen brief sullen sien of hoeren lesen, macke ick Ocke, here van Broeckmerlant ende van Aurekerlant, cond ende kenlick, also, dat ick mynen leven ende geduchten here, hertoge Aelbrecht van Beyeren, ruwaert van Henegouwen ende van Hollant, mit mynen vryen wylle, ende van mynen eygenlicken goede, tot enen rechten eygendom opgedragen hebbe ende overgegeven sulck goet, als hier na beschreven staet: eerst Broeckmerlant, Aurekerlant, twe burgen in Oldersem mit allen haren tobehoeren, die burge in Suderhusem, in Loppersem, in Syrcwerem, in Kanenghusem mit haren thobehoeren, den toern ende de kercke van Noerdenhoven, welcke goede vorscr. my myn lieve ende gedachte heer voergenoempt weder verlient hefft, my ende mynen nakomelingen, te houden, van hun ende van synen nacomelingen, tot enen erfleen; ende hebbe mynen lieven heere voerscr. geswoeren, ende in trouwen geloeft ende versekert, alse dat ick hun van desen goede doen sall alle, dat een getrouwe man synen rechten heer schuldich is te doen. Ende want ick dyt wyttelyck ende wael meyn te houden, soe hebb ick desen brief open bezegelt mit mynen zegele. Gegeven in den Haghe, s'dinxdages na Palmedach, int iaer ans Heren dusent driehondert een ende tachtig.
