| Nummer:oub0201 | Datum:1. Sept. 1406 | Overlevering:Editie | Vindplaats:Ostfriesisches Urkundenbuch, I, S. 170, nr. 201 |
Propst Hisko von Emden und Andere bekunden die von ihnen geschlossene Sühne zwischen Ailt Aindisna und Folkmar Allena's Sohn Ailt auf der einen Seite und den Schwestern Ale und Ige Ommingha auf der anderen Seite.
Wi Hisseke provest und hoevetlinck tho Embden, Embeco curet tho Westerhuisen, [*] und Haiko hoevetlinck tho Valderen bekennen opentlick und betuigen ihn dussen openen brieve, dat wy geendet und vastlichen gesoent hebben alle de schelinge und twidracht, de dar gewesen hefft tusschen grote Ailt Aindisna und junge Ailt, Folckmer Allena soen up de ene syde, und Ale und Ige Ommingha susteren up de ander siden, ihn aldusse wise, dat Ale und Ige susteren vorscr., ere neve und lande schall vry und quidt wesen, ock waer dat idt gelegen sye, als van aller ansprake und hindernisse, als van beiden Ailden vorscr. und alle ore nhakoemelinge sunder argelist, dan de olde huir, de men nhu van dussen jaer schuldich iss, de hoert Alen und Igen vorscr. tho. Tho merer tuechenisse der waerheit dusser vorscr. sone so hebben wy baven gescreven unse zegell beneden ahn dussen brieff gehangen laten, und wy grote Ailt und junge Ailt Folckmers soen, hoevetlinge tho Oisterhusen bekennen und belien[*] alle dusse vorscr. puncten, dat de waer sint, und hebben des tho tuige und tho ener merer waerheit unse inzegelen mede ahn dussen brieff gehangen. Int jaer unses Heren dusent veerhundert sesse, up sunte Egidii dach.
