| Nummer:oub0211 | Datum:6. Mai 1408 | Overlevering:Editie | Vindplaats:Ostfriesisches Urkundenbuch, I, S. 175, nr. 211 |
Keno tom Brok fordert die Städte Lübeck, Hamburg und die übrigen Hansestädte auf, sich bestimmt darüber zu erklären, ob sie gemeinschaftlich mit ihm gegen Hisko von Emden, Folkmar Allena und Hayo von Faldern vorgehen wollen.
Vruntliken groet tovoren. Leven heren unde guoden vruonde. Ey vorlanghet utermatene zere, warup dat gi mynen boden aldus lange entoven, dat my myn andworde wedder en kumpt, wes gi dar by doen effte laten willen, dat Hisseke van Emeden, Folkmar Allena unde Hayeke van Falren entholden unde uetmaken de zeerovers, de nu uetghewezen hebbet unde schepe unde guot genomen unde in de havene van Falren ghebrocht hebbet, dar zijk nuo tor tijd, zeder dat ik ju lest mynen breff zande, mer den drehundert vorsammelt hebben, unde beghere noch van ju, dat gi my weder scryven by dessen boden ene stede vast enkete andworde, wat gi darby don effte laten willen. Ik wil ju dar behulplik to wezen mit den, dat ik vormach, als ik den steden bezeghelt hebbe myne havene, slote unde land, de scholen ju open staen, als ik ju eer gescreven hebbe. Unde is dat ju dar wat umme zi, zo zendet by my van der stede weghene juowen vulmechtigen raed to donde unde to latende umme alle stuocke mit my overeen to dreghende; mer ist dat ju dar nicht umme en zi unde gi dit nicht keren en willen, also dat dit Hisseke, Folkmar unde Hayeken vorscreven aldus slicht to gude werden schal, so schal my myn schade leth wezen, den ik van den steden ye gheleden unde nomen hebbe, unde wil der breve, de ik den steden gheven unde bezegelt hebbe, to den eren unvormaned wezen efft id ziik anders velle, unde wil my des wol an ju vorwared hebben. Eyn andword beghere ik, dar ik my na richten moghe. Datum in die beati Johannis ante portam Latinam, meo sah secreto.
Keno hovetlingh to Broke etc.
Keno hovetlingh to Broke etc.
