| Nummer:oub0239 | Datum:3. Nov. 1413 | Overlevering:Editie | Vindplaats:Ostfriesisches Urkundenbuch, I, S. 196, nr. 239 |
Bürgermeister und Rath von Groningen versprechen Keno und zwölf Begleitern für die Zeit, da er sie von Delfzyhl nach Larrelt und zurück, geleiten würde, völlige Sicherheit.
Wy borgermester unde rad unde hofftmans in Groninggen unde gemene richters der Ummelande bekennen unde betugen in dessen openen breve, dat wi gegeven hebben unde geven eyn vast zeker geleyde unde velicheyt junkker Keenen vrunden, hofflingh to Broke, to twelf personen to off dar en bynnen vor uns unde vor alle de ghenne, de umme unsen willen don eff laten willen, velich lives unde gudes nu en neghesten mandage na datum desses breves uns to entfangende to Delffzile unde to brenghende to Lerlte unde wedder to Delffzile af unde to sunder alte arghelist. In orkuonde der warheyt zo hebben wi borgermesters vorscreven unser stadsecret up dat spacium desses breves gedrukket, des wi richters vorscreven up desse tiid hiran mede braket. Gegeven in den jaren unses Heren duzent verteynhundert unde drutteyne, des vrygdages na alle Godes hilgen daghe.
