Vertrag zwischen Häuptlingen aus Westfriesland, mehreren vertriebenen Ostfriesen und dem Herzog Johann von Baiern.

In den namen des Heren. Amen. Dit sint de puncten und articulen, de wy hoevetlincke uth Oistergoe und Westergoe landen mit den anderen luiden, de nhu thor tidt vordreven sint van Groningen, van Embden, by Oist und Westersiden der Eemse, und nhu thor tidt hir vorgaedert tho Staveren unde tho Sloeten, [*] de nhu doen willen tho ener heerlicheit und eren den durchluchtigen heren heren hertoch Johan van Beieren, als volget. Int erste dat wy em und synen arffgenamen tho ewigen tiden bekennen willen vor unsen rechten landesheren, up also puncten und conditien als hirnha beschreven steit. Item so bekennen wy unsen gnedigen heren dat alderhoegeste recht, dat iss tho vorstain, dat de greetmans und rechters scholen voeren van unses gnedigen heren wegen, den dat myt rechte boert in den ummegange, als dat van oldinges gewest iss, overst de greetmans scholen alle jaer komen tho Staveren vor unsen gnedigen heren offte vor den genen, den he dat bevalen hefft, und scholen dar oren eedt doen, dat se van unses gnedigen heren wegen allen luiden recht scholen helpen nha olden Freschen lantrechte; und unse heer offte den genen, de dat bevalen iss, scholen binnent jaer des rechte rekenschup darvan untfangen binnen Staveren offte bynnen een maent tides darnha van alle broeke, de welke unsen gnedigen heren ihn dat jaer vorschenen iss, und wes unkost des greetmans und ore mederichteren van des rechts wegen doen, dat schal van den broeke, de unsen gnedigen heren vorschenen sint, genamen weerden, desgelikes scholen ock de richters tho Groningen, als de greetmans tho Staveren doen. Item so bekennen wy unsen gnedigen heren syn hoefflandt und de huisslagen[*] twe Flemschen van itlichen huise des jaers; weert ock saeke, dat jemant missdede, de schall breken up em sulvest und anders nemant, und wurde he vorfluchtich, so schall em nemant untholden, und unthilde one jemant nha der tidt, dat he van den rechte vormaent wurde, so schall de sulvige den broeke vor em geven, als de missdeder sulvest doen schulde. Item wy bekennen ock unsen gnedigen heren de munte, ihn den he guidt golt und sulver slaen will laten, dat schall dueren twintich jaer ane vornyen. Ock so bekennen wy unsen gnedigen heren den tollen van allen guederen, so men uth den lande voert, den hundersten penninck van den uthheimschen landen, und wat guideren eenmaell vortollet sint, de scholen se fry voeren durch unse lande und strome, der wy nhu mechtich synnen unde bekamen moegen. Item offte jenige sehepe gruntroringe[*] deden, so dat he dat schip vorlore ihn dussen lande, so muchten de luide[*] uth den schepe liff und guidt bergen, und sunder hinder frie wesen van unsen genedigen heren; und we dat guidt helpet bergen, de schall een redelich arbeidesloen hebben; kumpt ock dat schip und guidt driven, dat dar nemant by weer, so schall de richter, den de eedt bevalen iss van des heren wegen, dat guidt annemen und vorwaren dat thor tidt, dat dar jemant nhakumpt und betuegen kunde dat idt syne weer, so schall men em dat guidt leveren up redelieh arbeitsloen. De richter, so dar nemant nhakumt binnent jaer, so schall he dat guidt tho unses gnedigen heren behoeff annemen den derden deell, den anderden deell schall vorschenen wesen der karcken, dar dat guidt ankumpt, den derden deel des guides, de dat gebarget, und or liff darumme gewaget hebben. So schall und will unse gnedige heer unse bescharmer syn vor alle landesheren, und vor alle de gene, de uns moegen beschedigen, vordedingen, und een ider, de van den synen iss vordreven uth den lande van Oistergoe, Westergoe, van Groningen, uth Embden eder uth de landen by der Oister eder Westersiden der Eemss weder by dat syne tho helpen, up dat he rustelich und fredelich dat syne mach gebruiken, als he plach tho doen er he vordreven was, und dat em missdaen iss van unsen gnedigen heren, beterunge darvan tho doen. Ock belavet uns unse gnedige heer, uns tho gene heervaert buten unse paele van Frieslandt nha de privilegie van keiser Carolo gegeven will vorderen tho trecken. Hirmede scholen vorgeven unde vorgeten syn alle saeken und handelt (de) vor dussen dage gescheen sint; und een iderman, he sy geestlich oder werltlich, he sy edell eder unedell, schall gebruiken alle privileiebreve und fryheiden, de se geheilt eder noch hebben van koninck Caroli tiden wente tho dusser tidt, uthgesecht dusse puncten vorgeschreven; und dusse puncten scholen ock gebruken alle eilande und ummelande und de tho de lande behoeren, und hirmede gesoent willen wesen, uthgesecht Amelandt und Schellinge. Datum Staveren ihn Westfrieslandt anno 1418.[*]

x

x

Fonds	Ostfriesisches Urkundenbuch, I
Fol.nr.	S. 222
Nr	263
Olim	Msc. A. 1 Fol. 221. Msc. A. 28. gedr. Worp von Thabor, Kronijk van Friesland, 4. Buch, Leeuwarden 1850, S. 35. Harkenroht S. 192. Matthaeus S. 189. v. Mieris IV, S. 502. v. Schwartzenberg I, S. 403. Lünig, Spic. Sec. II, S. 1863.
Jaar	1418

x

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 263