| Nummer:oub0280 | Datum:23. Okt. 1420 | Overlevering:Editie | Vindplaats:Ostfriesisches Urkundenbuch, I, S. 242, nr. 280 |
Bündniss zwischen den Häuptlingen Ocko tom Brok und Sibet von Rüstringen.
Ick Sibet hovetling in Rustringen do openbare allen luden mit dessen jegenwardigen breve, dat ick na rade ende vulbort myner vrende my lefliken mit guden vrigen willen unde wolberadenen mode hebbe vorenyghet, vorsonet unde verbunden mit juncher Ocken tho Broke, Awerke ende Emeden etc. hovetlinge, mit sinen erven, nakomelingen unde mit ab sinen vrunden vor my, myne erven, nakomelingen unde al myne vrunde in maneer unde vorworden hyr na bescreven. Int erste dat ick hebbe overgheven unde wedder tostaan, overgheve unde wedder tosta jegenwardich deme ergenanten juncher Ocken, sinen erven, negsten nakomelingen, vrunden dat slot tho Jever mit deme wicbelde, gheest, vryheit, tobehore, in dorpe, velde unde lande bynnen ofte buten, wor dat by beleghen is. Item so hebbe ik Sibet ergenant in der vorscreven wyse iuncher Ocken, synen erven, naghebornen unde nacomelyngen Ghokerken, [*] dat alighen[*] kerspel, also alse dat mit siner vriheit olinges heft beleghen wesen, unde Wangeroghe mit siner tobehore, mit waterlope unde strome, alse mine erven unde negesten nakomelynge nummer in to komene to ewighen tijden, dar up sullen noch en willen spreken, veyden noch wreken hemelik noch openbaar, noch mit rade noch mit dade; desgelykes so schal ik noch en wille myne erven unde negesten nakomelynge spreken, veyden noch wreken up jenighe lande ofte lude, alse juncher Ocken unde syne vrund de nu tho der tyd hebben in bysyttener were. Vortmere[*] so voerbynde ick my in formen unde wyse voerghescr. to juncher Ocken, synen erven, nakomelynge unde vrunden, dat yck scal unde wyl myt en, unde he myt my also wyd unde lanck alsse Vreslant strecket unse Vreske palen unde vrydom samentlyke offte besunderen bescermen, weren unde keren voer aller Dudeschen heren ofte steden overmacht unde ghewalt, myt lyve unde gude, ware unde wannere des noth ys to donde unde yck unde myne vrunde daer tho eschen woerden, unde is dat juncher Ocko unde syne vrunde dorch alle Vreesland my unde myne vrunde daer tho bedarff hebben unde esken, dat scullen wy doen up ere koste na der tyd wy tho Auryke kamen; des ghelykes sculen juncher Ocko unde syne vrunde uns helpen wedder up my unde myner vrunde koste na der tyd dat se in Ostryngen unde in dat verdendele kamen, eyn ytlyke deme anderen bystandych to wesende, myt lyve unde gude. Vortmere so hebbe yck my voerplychtet unde voerplychte jegenwaerdych myt juncher Ocken voerscr., were yd dat de heren van Oldenborch, de over Wesersken[*] ofte jenich here edder ander lude uns scaden deden ofte doen leten in ofte uth der herscop, myt roverye, devereye, ofte myt mortbernenne, also se alsus lange daen unde doen laten hebben, dat scal yck unde myne vrund myt juncher Ocken unde myt synen vrundene keren unde weren wor unde wannere wy daer to eschet werden, unse ere tho voren myt breven in de hele voerwaret of in der lude entholder. Vortmere so hebb yck my myt juncher Ocken unde syne vrunden voerplychtet unde vorbunden: were dat juncher Dyderyck unde .juncher Kersten juncher Ocken und syner junchfrawen Ingeberch eren brutscad uth der herscop nycht volgen laten wolden gelyck als juncher Mauricius ere vader[*] selyger dechtnysse unde gude herscopsman unde ander vele gude lude dat en voerbrevet unde vorsegelt hebben, so scal yck unde wyl na achtende Paesken negest tho kamende dat juncher Ocken unde syner junchfrawen helpen to manene unde to kerende in de heren vorghescreven, ere undersaten unde up de herscop na alle myner macht, yd en were sake dat yck unde myne vrunde dat myt guden deghedyngen unde myt vaster vruntscup tovoren twyschen de erghenannte heren unde juncher Ocken unde syne vrunde vor vangen mochten, dat juncher Ocken unde syner junchfrawen dat ere volgede sunder voerdreeth. Item so hebbe ik unde myne vrunde uns to juncher Ocken unde sinen vrunden vorplichtet unde vorbunden in der vorghescreven wise, dat ik vor my, myne erven unde nakomelinge vrunden vrij, quijd, ledich unde los scholde unde late al man sin angheborne erve, de nu tor tijd under juncher Ocken unde sijnen vrunden an desse syd der Emese beseten synt, dat esse sy in Wange, Ostrynge, boven Jade ofte buten Jade belegen, yd en were sake, dat welkes mannes erve tovoren openbare were vorvuchten myt doetslage, vorkoft ofte vorset, so dat men myt rechte daer nycht en mochte upspreken van den ancleghere unde daer schal ik unde myne vrunde twe kloke man an de eyne syd unde juncher Ocke unde syne vrunde twe an de ander syd to voghen, de de anclage unde antworde horen unde rychten bynnen Jever ofte Auryke na overkumst der vere dar tho ghesatet up welker stede dat nutte is, de vere schullen de anclage unde antworde handelen, ummedraghen unde richten by swornen eden na rechte unde dat nicht umme leff ofte leet, umme gave ofte gued to latende unde dat nycht bynnen enen mande daer na dat de anclage schud uth tho sprekene, unde de veer schedeslude yo umme eyn maenth thosamende up der tweyer stede eyn erghenant to komene; desgelijkes schullen de vere mechtich wesen to schedene up dode halse, de nycht in opener veyde gheslagen sint, daer men gude bewisynge to bringen mach. Vortmere so hebbe ik my vorplichtet unde vorbunden mit minen vrunden to juncher Ocken unde sinen vrunden, alse vorghescr., dat ik unde myne vrunden nene misdadige lude alse mordere, stratenschynnere, vrouwenschender, deve ofte mortberners malk up den ofte tegens malkanderen edder up malksanderen vrunden schullen noch en willen untholden twischen der Lawerse unde der Wesere unde war ofte wanner unse jenich den anderen so dane lude na desser tijd clagenden een recht wedderfaren mochte to der ver lude segghene unde de handadege dat recht wedderspreke, so dane mysdedere schullen wy samptliken ofte bisunderen vorvolghen unde richten als men so danen luden na rechte plichtich is to donde sunder jenigerleye vorholt unde beschuddinge. Vortmer so wille wy den copman unde allen luden bynnen ofte buten Vreschen palen to watere unde to lande eyne velyge straten holden, id en were dat uns myt yemande orlich anvelle van not wegene buten Vreschlande, wes dan den copmanne darover scheghe, de under den ghennen besethen were, dar wy dat orlich mede hadden, des wille wy van hem unvormanet wesen. Item so wille wy unde unse vrende allen luden bynnen Vreschen palen bruken laten ere holtmarke, oer erve unde gud, dar se recht to hebben in den wede, unde[*] den wede sammetliken beschermen unde nyne heren darin to stedene noch herlychheyt darinne to gunnende wesen unde de wede by Rustrynge lande to blivende. Item so en schal ik, myne erven unde negesten nakomelinge, noch en willen nummer to ewighen tijden nene veyde noch twidracht hebben edder annemen mit juncher Ocken, sinen erven unde vrunden, vor my noch vor myne vrunde, der ik mechtich bin edder ummer mechtich werden mach, unde were dat dar yumant van mynen vrunden ofte vrenden[*] de ik mechtich[*] werden mochte desse vorscreven articule up juncher Ocken, sinen erven unde vrunden wolde vorbreken ofte vorbreke, dat God vorbede, dat wil ik mit mynen vrunden herrn mit live unde mit gude na alle myner macht. Item so schullen alle olde unde nyge breve, de unse olderen thovoren unde wi na tosamende gegheven hebben in erer vuller macht bliven van den Kanken kinderen. Alle desse vorscreven articule samptlike off bisunderen love ik Sibet vorghescr. unde swere lifliken stavedes edes mit upgerichteden vingeren alse een gud kristene juncher Ocken ergenant, sinen erven, negesten nakomelingen unde vrunden stede, vast unde unvorbroken sunder alle argelist, nygevunde und valsche intreckinge to holdene; unde dat alle desse vorscreven articule van Sibete vorgescr. synen erven, nakomelingen unde vrunden in aller mate alse de hir siut bescreven unde vastliker geholden werden, so enkenne wij uns alle by namen hir naghescreven, alse Lubbe Sibet, Meme sin broder, Haye Lubben sone, Yneke sin broder, Ricleff Amessen, Taddeke sin broder, Gherke Onnekes, Yke sin broder, Nanken Duren sone, Dure Nassen sone, Eggho Herynges, Ummo Tannes, Hilderich Dedden, Ernst to Pakenze, Folkert Yagheson, Tyark Almedes unde Edelmer to Salenstede vor rechte borgen, vor uns unde unse erven, dat Sibet unde sine erve erghenanth se vast unde unvorbroken holden schullen, alse vorscreven steil, unde wij vorscreven borgen na Sibetes ede gesworen, so love wy samentlike unde bisunderen juncher Ocken sinen erven, nakomelingen unde vrunden, were[*] dat Sibet ergenant ofte sine erven unde vrunden dat jergenemede vorbreken wolden, dat God vorbede, dat wij dat keren unde weren willen unde schullen mit juncher Ocken, sinen erven unde vrunden, mit live unde gude na al unser macht, samentlyken ofte bisunderen. In orkunde desse vorscreven articule, so hebbe ik Sibet ergenant myn ingesegel vor my unde myne erven unde nakomelingen witliken unde mit willen beneden to dessen breve hangen laten, unde to ener meren betuchnisse unde warheit desser vorscreven articule unde worde, so hebben wy borgen vorscreven unse ingesegele mit Sibetes ingesegele ergenant ok witliken unde mit willen hangen laten beneden to dessem breve. Datum anno Domini MoCCCCo vicesimo, ipso die beati Severini episcopi et confessoris.
Desse[*] vorghescreven vorbundynge unde vorplychtynge hebb yek her Jolleff kerckher tho Banth unde Ensmaerhave uthscreven uth den bysegelden breff, de daer was besegelt mit 14 segel, in deme jare MoCCCCCoXVIII, altera die post cinerum.
Desse[*] vorghescreven vorbundynge unde vorplychtynge hebb yek her Jolleff kerckher tho Banth unde Ensmaerhave uthscreven uth den bysegelden breff, de daer was besegelt mit 14 segel, in deme jare MoCCCCCoXVIII, altera die post cinerum.
