| Nummer:oub0291 | Datum:25. April 1421 | Overlevering:Editie | Vindplaats:Ostfriesisches Urkundenbuch, I, S. 252, nr. 291 |
Focko Ukena verlobt seinen Sohn Udo mit der Hymba Itzinga von Norden und giebt Versprechungen in Bezug auf den Güterbesitz der Familie seiner Schwiegertochter, auch gelobt er, den Oheimen der selben, Haro und Imelo, förderlich und friedsam zu sein.
Focko Ukana hovetlinck to Lheere, doe kundich allen luden tot ewighen tyden myt dessen openen breve, als van der trouwen ende der samenloffnisse, de myn zone Udo gedaen heft myt mynen consente ende willen der juncvrouwen Hymben, vrouwe Sybben dochter, der vrouwen to Norden, also dat ich Focko vorscreven voer my ende mynen zone Uden vorscreven, ende voer alle onse vrenden, nacomynghen, ende erffghenamen, vrouwen Sybben vorscreven ende horen broderen, als Haren, hovetlinck to Lherlte, ende Imelen, hovetlinck to Grymissum vollenkomelike sonder yenigherhande arghelist ende byredene ofte wedersegghen stadeliken ende trouweliken ontheeten ende loven to holdene desse puncten ende saken, de hyr naest bescreven staen. Int yrste soe ontheeten wy Focko ende Udo vorscreven ende loven, ofte dat also gheschede, dat Udo ende Hymbe vorscreven en ghene kyndere levendich en hadden, ende ofte des Godt almachtich verbede, dat Udo ofte Hymbe, alleen welkeer van hem tween, de der yrste storve, soe sulle wy Focko ende Udo vorscreven ende onse erffghenamen dat lant to Norden myt synen borghen ende sloeten, myt allen synen rechte ende tobehoer weder overgheven der vrouvven Sybben, ende Haren ende Imelen vorscreven ofte horen erffghenamen, also guet ende eerlic, als wy dat myt Uden mynen zone, als vorscreven ys, ontfanghen hebben. Voertmeer soe ontheeten ende loven wy Focko ende Udo vorscreven voer ans ende onsen erffghenamen, dat wy vrouwen Sybben, Hymben moder vorscreven sullen blyven laten in horen olden eerliken state, als se to voren heft ghewesen, ende nyet en sal bedrucket ofte behyndert wesen in gheenreleye saken, noch van der borgh de men nomet de Oldeborgh[*] verdreven wesen. Item soe ontheete ende love wy Focko ende Udo vorscreven voer ons ende onsen erffghenamen, ofte na den willen Godes also gheschede, dat vrouwe Sybbe storve, ende ic Udo myt Hymben vorscreven leveden, so en solde wy up dat dorp ende heerlicheit to Lherltt noch up erve ende guet, dat daer to behoert, en ghene ansproke na erffnysse als van Hymben weghen vorscreven hebben, anders dan up dat sunderlinghe guet, dat vrouwen Sybben mede to Norden ghegheven waert, do en se Ewerede, [*] den God ghenadich sy, to eenre vrouwen ghegheven waert. Voertmeer so ontheete ende love wy Focko ende Udo vorscreven, dat wy Haren ende Imelen vorscreven sullen behulpelic en vordelic wesen myt al onser macht, ofte sych dat so gheschede, dat se onser behoveden, ende hoer beste to done myt onsen lyve ende guede, bynnen landes ofte buten landes woer dattet sy, waer wy konnen ende vermoghen, ende ene vaste trouwe ende vrenscap staedeliken to holdene in allen saken, als vorscreven ys, al arghelist ende droch uuotghescheyden. In enen ghetughe ende meere vastenisse ende waerheit desser vorscrevenen puncten ende loffnissen, soe hebbe wy Focko ende Udo vorscreven voer ans ende onsen erffghenamen ende nacoemynghen onse seghelen an dessen breef ghehanghen. Ghegheven in den jaer ons Heren dusent vyer hondert ende en en twyntich, des vrydaghes na Cantate Domino canticum novum, Alleluia, quia mirabilia fecit.
