| Nummer:oub0341 | Datum:Larrelt, 18. Juli 1426 | Overlevering:Editie | Vindplaats:Ostfriesisches Urkundenbuch, I, S. 307, nr. 341 |
Häuptling Imelo zu Grimersum und Larrelt verspricht den Eingesessenen der Bauerschaften Grimersum, Wirdum und Jennelt gegen Erfüllung des in der vorigen Urkunde Zugesagten Freiheiten und Schutz.
Ik Imelo hoefftling to Grymissum unde Hlerlte etc. enckenne openbare vor allesweme in dusser yegenwordigen scryfft unde bewyse des myt dussen openen bezeghelden breve, dat ik hebbe vry unde qwyt ghescholden unde ghelaten, unde schelde yegenwordich unde late vry unde quiit zamentlike dessen benomeden dre huren, als by namen Grymissum, Wyrdum ende Geneleed, myne undersaten zamentlike van aller sehattynge, eyghendome unde dwanghes weghene nu unde yummer to ewegen daghen vor my, myne kyndere, rechte erffghenamen unde nakomelynge, gheboren unde ungheboren to ewegen tiiden, utghesecht den vorghescreven buren in zamentlike, offt een yewelk van dessen by zyck, dat ik Imelo hoefftling vorgenant hebbe wesen begherende unde beghere noch yeghenwerdich van den vorbenomden buren und all eren erven unde naekomelingen to ewigen tiiden, dat se my unde den mynen kynderen, rechten erffghenamen, unde naekomelingen vorg. offt besitter der borch unde heerlicheit des slottes to Grymissum belegen zullen helpen dat vorbenomde slot to begravene ummelanck, bollewerken, tymmeren unde bevesten also vast unde starck, dat ik unde de mynen naekomelynge vorbenent myt den vorbenanten buren unde ze weder myt my unde den mynen vorgescreven zamentlike mogen uns daer uppe beschermen lyves unde guedes vor unse viande, wederpartien, unde vor alle deghenen, de uns vorbenanten zamentliken offt yenigen besunderling van uns wyllen beschedeghen, schadelich unde hinderlich wesen an lyve offt an guede, unde wy vaken vorg. myt malkanderen zamentlike dat to keren unde wreken myt lyve unde myt guede. Item zo begere ik Imelo hoeftling vorgescreven van den vorbenanten buren vor my unde de myne vorghescreven, dat de vorg. buren zollen des jares eens to ewegen tiiden van elken huse zunderlingx halen malk enen waghenlast torves uppe den vane van mynes zulves off der myner vorb. eghenen torve unde dat to Grymissum upper slot vorg. to bryngen. Item des jares eens enen zweler van elken huse besunderling to levernde, enen dach to zwelende to des slotes behoeff. Item zo we unde welker buer van dussen vorg. buren bezeten off wonachtich is uppe den werven off huessteden, beleghen bynnen dussen vorb. buren, de de horen offte sint der herlicheyt des slotes to Grymissum, de zall all des jares eens enen halven gulden gheven to hure. Item zo zullen desse vorg. buren zamentlike altomale my Imelen hoefftling vorg. unde den mynen, eyn recht besitter der herlicheyt des vakenanten slotes, volghen, hulpelich unde bystandich wesen myt lyve unde guede, bynnen unde buten des landes, waer, wannere unde in welker stunde, men dat van se begeret to unsen besten. Vortmer boven alle dussen vorbenanten puncten, zo zall dat recht unde redscup myth to behore der herlicheyt over de vaken vorgenanten buren my Imelen hofftling unde nae my den mynen naekomelingen rechten besitter van myner wegen des slotes ende herlicheyt to Grymissum vorg. to behoren, unde ik unde de myne vorg. de broke van den mysdedigen to nemende unde den ungehorsamen unde overtredere des rechtes to strafende, dat daer eyn ander an dencke unde des unvormaend to wesende; des zo love ik Imelo hofftling vakenant vor my, al de myne vaken vorscr. gheboren unde ungheboren, den vakenanten buren dusse vorbenante vryheit vul unde all wal to holdene in gueden truwen eweliken, stede, vast unde unvorbroken, alle arghelist, nyevunde, offt hulperede utghezecht, de dussen breef moghen straffen unde der vorb. vriheyt entegen gaen. Desgheliken zo loven de vorb. buren zamentlike in eren bezeghelden breven my Imelen hofftling unde den mynen vaken vorb. naekomelingen, alle de begheringe ende bede hulpe my unde den mynen vorg. eweliken in gueden truwen to twidene unde to holdene zunder alle arghelist. In orkunde der vorg. punte unde artikelen unde in ener merer bevestinge willen unde tuechnisse unde warheyt, zo hebbe ik Imelo hofftling vorg. mynen inghezegel wytliken doen hangen beneden upp spatium dusses breves unde hebbe des ghebeden de erliken prestere hern Habben, kercheren to Grymissum, heren Jalen to Wyrdum unde heren Tyen kercheren to Jeenleede dussen openen breeff myt my to bezegele, des ere inghesegel yeghenwordich openbaer siint ghehangen upp yeghenwardich spacium dusses breves. Ghegeven unde screven nae der bort uns Heren Jhesu Christi veerteyn (hundert)[*] jare ende daer nae in dem ses unde twyntichsten jare, bynnen Hlerlte, in den daghe[*] Arnulphi confessoris; unde wes tovoren is gescreven van der broke unde van den mysdedigen to nemende, zal wesen nae lantrechte dryvoldige bote ende dryvoldige broke etc.
