| Nummer:oub0346 | Datum:25. April 1427 | Overlevering:Editie | Vindplaats:Ostfriesisches Urkundenbuch, I, S. 311, nr. 346 |
Friedensvertrag zwischen dem Grafen Dietrich von Oldenburg, Ocko tom Brok, Bremen, den Umlanden und Groningen einerseits, und Focko Ukena und Sibet von Rüstringen auf der andern Seite.
Wy Dideric van Godes ghenaden greve to Oldenborch, Ocko toe Broek, Auwreke ende Emeden etc. hoifflingh in Oestvreeslande, borgermeisteren ende raed der stad van Bremen, hoifftlinge, rechters ende mene meente van Hunsege, Fywelinge, Langwolt, Fredewolt ende Humerke landen ende wy borgermeisteren ende raed van Groningen begeren kundich to wesen allen gueden luden ende bekennen openbaer dat wy omme der schelinge, twidracht ende veede willen, die belegen is tusschen uns voirbenoemden an der ene syt, ende Focken Ukens ende Sybet in Rustringe hoifftlingh ende oren hulpers bynnen Vreeslande an de ander syt, ons lieffliken mit malkanderen vereniget ende verbunden hebben, verenigen ende verbynden tagenwordich in dessen selven openen breve, also dat wy voirghenoemden samentlike tegens Focken, Sybet ende ore hulpers die veede anghenomen hebben ende annemen to endigen, uut to draghen ende malk den anderen daer umme bystendich to wesen mit live ende mit guede. Ende ok uns enich sonder den anderen, als wy voirbenoemden syn mit Focken, Sybet, noch oren hulpers nicht to vreden noch to zoenen in enigerwijs, ten sy by rade, consente ende wille onser alre eenpartliken. Voirtmeer, so syn wy voirbenoemden mede lieffliken overdraghen ende hebben ons also verbunden, offt zake were, dat na dessen tyt tusschen der Lauwersch ende der Weser zich yemant tegen ons offte onser enich verhaeve mit onrechte ende gheen recht nemen en wilde, so solden wy samentlike daer toe helpen malkanderen mit live ende mit guede, dat wy tegens den ghenen qwemen toe ere ende toe rechte, die dess tegens ons ofte onser enich begunnede. Ende wanneer ons ere ende recht mach wedervaren, dat willen wy ummers nemen. Item off na dessen tyt velle enige nye schelinge tusschen den twen parten van ons voirbenoemt, dat sal scheyden de derde part to ere ende to rechte sonder enigerleye voirweygeringe daer ynne to doen. Item so syn wy voirghenoemt mede overdraghen, dat onse coipmans ende schiplude elk onder den anderen solen vry varen, keren ende meren op sulken toll, als van oldes ghewoenlic plach to wesen, ende offt van onsen coipmans ende schippers in dess anderen lande offte havenen yemant schipbrekinge lede, bynnen dunen offte buten dunen, die sal daer zijn guet moghen berghen ende toe lande brengen sonder yenigerleye hynder offte ghewelt van den anderen. Ende weert, dat em yemant dat guet hulpe bergen, die sal daer redelic berghgelt van nemen. Desse voerscr. verbunde, overdrachte ende punten loven wy elk den anderen als wy voirbenoemden staen onverbreckelic stede ende vaste to holden alze guede mannen toe twintich jaren naest comende, na datum desses brieffs, sonder argelist. In orkunde hebben wy Dideric greve toe Oldenborch onse segel, ik Ocko to Broeke etc. hoifftlingh voerscr. myn zegel, wy borgermeisteren ende raed der stad van Bremen onser stadzegel, wy hoifftlinge, rechteren ende mene meente van Hunsegelande dess Halffampt zegel, daer ons nu ter tyt an ghenoeget, wy hoifftlinge, rechteren ende mene meente van Fywelinge lande onss landes zegel, ende wy borgermeisteren ende raed der stad van Groningen hebben ons stad zegel an dessen brieff ghehangen, daer ons rechteren ende mene meente in Langwolt, Fredewolt ende Hummerse toe desser tyt an ghenoeget. Ghegeven in den jaer van der boirte onss Heren dusent vierhundert seven ende twintich, in sante Marcus daghe ewangeliste.
