| Nummer:oub0348 | Datum:29. Mai 1427 | Overlevering:Editie | Vindplaats:Ostfriesisches Urkundenbuch, I, S. 313, nr. 348 |
Ochs tom Brok und seine Partei unterwerfen sich zur Beilegung ihrer Streitigkeiten mit Focko Ukena, Sibet und deren Partei einem Schiedsgerichte des Rathes zu Bremen und der Richter und Eingesessenen des Butjadingerlandes und von Wursten.
Wy Ochs to Broke, Awreke unde Emeden etc. hovetling in Oestvresslande, borghemestere unde raed der stad van Groninghen, Ocko to Loqwerden, Sybern to Edelsum, Dodo Keensma, Insel Haringhes, Reborch unde Omeke Goltsmyd borghere to Emeden, bekennen ende betughen in desser scryfft, dat wy unse vrend, partyge unde helpere synd ghebleven by deme rade unde der stad tho Bremen unde den raedgheven unde den landluden der lande Butenjade unde Wursten vruntliker schedinghe aller schelinghe unde twydracht, de tusschen uns, Sybethe in Rustringhen, Focken Ukens to Hlere, Uden to Norden, Imelen to Grymessum, Ennen in der Greed hovetlinge, Imel Hisseken zoen, Hidde Kanken, Tadeke Ammessen, Wybet to Stedestorpe eren vrenden, [*] hulperen unde partygen upghestaen synd van der tyd, dat desse veyde anstaende was tusschen Focken, syner partyge unde uns wente an desse jeghenwardighen tyd; ende wes wy van den erghenompden rade unde landluden in vruntschopp besocht werden, loven wy vorscr. in guden truwen by unser ere vast, stede unde unvorbroken to holden dar eynes vruntliken daghes upp vorramet is, namentliken de vrygdach vor Pynxsten neyst to komende uppe der Jade beneven deme Swynen, [*] den wy holden unde soken solen unde willen, dar wy unse vrend, partyge unde hulpere den vorbenompden Sybeten, Focken etc. unde we myd en off van erer weghen dar komende werd tho unde aff wal vorwaren willen in velicheit, sunder jenigherleyge arghelist offte behende[*] vunde. Des to bekantnisse hebben wy Ocko to Broke etc., borghemestere unde raed der stad van Groninghen, Ocko to Loqwerden, Sybern to Edelsum, Dodo Keensma hovetlinge, Imel Haringhes, voghed to Emeden unse ingheseghele hanghen heten an dessen breff, unde umme den, dat wy Hinrik Reborch unde Omeke Goltsmyd vorscr. nyne ingheseghele en hebben, so hebben wy ghebeden unser stad ingheseghel mede an dessen breff to hanghende. Datum anno Domini Mo CCCCo XXVIIo, in festo ascencionis Domini.
