| Nummer:oub0361 | Datum:16. Sept. 1427 | Overlevering:Editie | Vindplaats:Ostfriesisches Urkundenbuch, I, S. 325, nr. 361 |
Focko Ukena, Imelo von Grimersum, Imelo von Emden und Enno von Greetsiel söhnen sich mit der Stadt Groningen aus und gewähren ihr freien Handel in ihren Gebieten, dort ohne Zoll, Weggeld, Schreibgeld oder andere Unkosten zu verkehren.
Wij Focke Ukens hoefftling to Lere ende syne kynderen, Imele van Grymessum, Imele van Eembden ende Enne in de Greet hoefftlingen bekennen openbaer voer allen guede luden ende betuegen myt dessen oepenen breve, dat wij den eerbaeren borgermesteren ende raedt der stadt van Groeningen ende oeren menen borgeren ende inwoneren ende oeren hulperen gegeven hebben ende gheven voer ons ende onse nacomelingen ende erffgenamen ende voer onse undersaeten eene steede, vaste soene van alre schelingen, die wij met hem hebben gehadt ende van allen saecken, die gescheet sijn voer dessen tijdt, datum des breves, woe off waer van de saken ende schelingen heer gecomen sijn, ende loven deselve stede ende vast ende onverbroeken to holden bij unsen eere ende truwe als guede luden, myt vorwarden, dat de borgers ende inwoners van Groeningen overall in unssen gebede vrij ende velich varen ende keeren solen moegen hoere coopmanscip ende hanterynghe to doen bij daeghe ende bij nachte unbelet ende unbeset voer uns ende unse undersaeten sunder jenych toll, wechgelt, schryffghelt offte anders onghelt dat men anleggen mach, daer in voertijden gheen toll, wechgelt off schryffghelt gewesen heefft. Voertmeer soe loven wij voerscr., dat men dat slot toe Delfzijle naeder breken sall veerteyn dagen voer sunte Michiell naestcomende, ende voert wij noch unser jenich gheen bewynt to hebben in Hunsege, Fywelinghe, Oltampt, Reyderlandt ende den landen bij Groeningen geleghen, ten sij bij consente der Ommelanden, die nu gevrijt sijn van den verbunde ende loffte, wie se in voertijden mytten van Groeningen gehadt hebben, noch ons der landt toe underwynden, als voerscr. is; vorder dan wij Focke hoefftlinck voerscr. van mijns wijves wegen, alse van hoeren goede geboren mach gelyck andere hoefftlingen in den landen nae hoeren goede, ten sij dat wij off yemants van uns nu goede in den voerscr. landen hebben, offt ons offt onse naecomelingen in toecomende tijden myt rechte ancomen mach. All arghelist uutgesproken. In oerkunde soe hebbe ick Focke hoefftlinck voer mij, mijnen kynderen ende voer ons allen voerg. mijn segell an dessen breeff gehangen. In den jaere uns Heeren dusent veerhondert soven ende twyntich, des dynxsdaghes nae des hylligen Crucis dach exaltationis.
