| Nummer:oub0448 | Datum:26. Okt. 1435 | Overlevering:Editie | Vindplaats:Ostfriesisches Urkundenbuch, I, S. 409, nr. 448 |
Das Kirchspiel Wiesede unterwirft sich dem Grafen Dietrich von Oldenburg und verpflichtet sich unter Angabe der näheren Bedingungen zur Treue.
Wy Meleff, Gerleff, Hanneke, Habbe unde Willeke enkenet openbaer in dessen breve vor allesweme, dat wy van des gansen kerspels wegene to Wisede[*] uns leffliken unde vruntliken hebben vordregen unde vorgan mit dem eddelen juncheren Diderike greven to Oldenborch unde synen erven in sulker wis so hiir nascreven steil: (Von hier an folgt wörtlich der Text der vorigen Urkunde, nur fehlt hier der Satz unde we dar ene egene ploch heft u. s. w. bis Konenvorde;) unde en alle desse vorscreven stucke, articulen unde word, unde der en jewelik bisunderen, love wy Meleff, Gerleff, Hanneke, Habbe unde Willeke alle vorben. vor uns unde dat ganse kerspel to Wisede, den eddelen greve Diderike unde synen erven vorscreven in guden truwen in dessen breve stede unde vast to holdene, unde hebbet dat na mit unsen upgerichteden liffliken vingeren stavedes edes to den hilgen gesworen sunder alle nygevunde, hulperede unde argelist utgesproken, unde hebbet des to tuge des gansen kerspels to Markese ingesegel, dat se uns mit guden willen hiir to lenet hebben, witliken gehenget heten to dessen breve, des wy hiir samentliken to brukende zynt umme gebrak des unses, dat wy sulven nyn en hebben. Na der bord Christi verteynhundert yar, dar na in deme vieff unde dertigesten yare, des midwekens vor Simonis et Jude.
