Der Hamburger Amtmann Detlef Bremer zu Emden bekundet die Bedingungen, unter denen Hayge Grisinghe ihm Urfehde geschworen hat.
Witlik unde openbar sy allen den ghennen, de dessen breff zeen edder horen lesen, dat ik Detleff Bremer, radman to Hamborch, nu tor tyd vorwarer in Emeden, bekenne unde betughe openbar in desser scrifft, dat ik my vruntliken hebbe vordraghen myt Haygen Grisinghe in desser nascrevenen wyse, so dat he hefft orveyde ghedan unde myt uprichten vingheren staveden edes sworen to den hilleghen tyeghen de van Hamborch unde de ghemene hensestede unde ere vrunde, de myt en sint in vorbunde unde tyeghen den menen kopman unde den hofftman to Emeden unde den van Emeden unde ere vrunde nicht to donde noch myt rade offte mit dade, unde dessen vorscreven na desser tyd truwe unde holt to wesende myt live unde myt gude. Unde schal wonen to dessen jare Emeden nicht negher wen up ene myle weghes na, unde he mochte sik so vruntlik bewysen by deme to Emeden, dat he em des ghunde, dat he na dessen tokomende jare wonede wor dat em bequeme were. Unde mach ok varen vry unde velich vor uns unde vor de unse buten Emeden, war dat em ghenoghet, keren unde vorkeren in deme, wo dat he nicht umme en gha myt quader bodeschup offte quader handelinghe, de den van Hamborch unde den van Emeden mach untyeghenghan. Vor desse orveyde, dat de van em schal gheholden werden stede unde vast, alse vorscreven is, sunder alle arghelist unde nygevunde, dar hebben vor ghelovet Honne to Hinte unde Egge Federken to Borsum van siner weghen. Wert sake, dat he desse sone unde orveyde so nicht en helde, alse vorscreven is, dat men em myt rechte mochte over bewysen, dat he hedde misdan offte misdede, den schaden unde broke schal men manen up de borghen unde up ere erven. Desse vorscreven love wy borghen vorbenomed myt deme hovetmanne stede unde vast to holdende. Des to tughe unde merer bekantnisse der warheit, so zint desser breve twe, de ene ute dem ander ghesneden. Des wy her Ulbet, kercher to Emeden, unde Gherlt Egghena van ghebreckes weghen desser vorscreven borghen, dat se ghen ingheseghel en hebben, unse ingheseghel witliken hebben ghedrucket neden up dat spacium desses breves, den her Detleff Bremer vorbenomed van en hefft untfanghen. Gheven unde ghescreven na der bort Christi dusent veerhundert in deme sess unde druttigisten jare, des neghesten dinxdaghes na sunte Juriens daghe, des hilleghen ridders.
x
| Edities |
E. Friedländer, Ostfriesisches Urkundenbuch I (Emden 1878), nr. 455 |
