| Nummer:oub0465 | Datum:6. Jan. 1437 | Overlevering:Editie | Vindplaats:Ostfriesisches Urkundenbuch, I, S. 422, nr. 465 |
Graf Dietrich von Oldenburg bekundet, dass Friedrich Plump mit seinen Söhnen und Freunden seinen Sohn Martin vor ihm beauftragt und bevollmächtigt hat, in ihrem Namen wegen der Sühne für den von Acke zu Westen-Aurich erschlagenen Johann zur Wert aus Ackum zu unterhandeln.
Wy Diderik van Godes gnaden, greve to Oldenborch unde Delmenhorst, bekennen unde betugen in dessen, breve openbare vor alsweme, dat vor (uns) is gekomen Frederik Plump mid sineme sone Martinse unde andern sinen sonen unde frunden, unde bekande openbare vor uns in jegenwardicheyt unser leven getruwen, wo he Martinse vorgenant hadde upgelaten unde leet up darsulves van sick unde siner frunde wegene alle tosage unde schulde, de he unde sine frund hadden unde hebben mochten to Acker, to Wester Awreke .unde sinen frunden, de em afgeslagen unde gemordet hebben Johanne tor Wert, wonaftich wandages in dem kerspele to Ackem, so dat de ergenante Martinus van des vorbenanten sines vaders, siner broder unde al siner frund wegene wesen schal unde is vulmechtich van der vorscreven sake wegene to latende unde to donde, to bemanende unde sone to gevende geliik oft se alle daran unde over unde jegenwardich weren unde dat mede loveden unde vulborden, dat de ergenante Frederik sine sones unde sine frund dem vorbenanten Martinse, sineme sone, in unser unde unser getruwen jegenwardicheit van des vorg. Johans, sines doden ohmes wegene, dar he de hemelkeste[*] unde negeste mach[*] to was, lovede in guden truwen stede vast unde unvorbroken to holdende sunder jenigerleye insage, hulperede unde argelist. Des to bekantnisse dat vor uns Diderike, greven vorbenant dat so geschen is, alse vorgescreven steyt, so hebben wy unse ingesegel hangen heten to desseme breve. Na Godes bord dusent verhundert, darna in deme seven unde drittigesten jare, ame hilgen dage der drier koninge.
