Der Häuptling Wibet von Stedesdorf u. s. w. räumt dem Häuptling Ulrich von Greetsiel und dessen Frau Folke, Wibets Tochter, die Burg Esens ein, und behält sich, unter Festsetzung besonderer Bestimmungen, eine Leibzucht vor.

Wytlick unde kondich sy allen luden, die dessen brief sien ofte hoeren lesen, dat ick Wypte van Stedesdorp, hoeftling toe Esenze unde toe Auricke, opdreghe unde hebbe opghedreghen unde ghegheven myt vrien unde walbedachten wyllen, ghesondes lyves ende synnes, sonder wederroepynghe unde wedersprake myns unde mynre vrenden, dem eersamen manne Ulricke Ennen soen in der Griet, hoeftling in dem nyen lande unde toe Aurick, unde mynre dochter Folcquen synre huysvrouwen, die borch toe Esenze myt oeren toebehoere, soe he unde ze nu ter tyt die besitten unde ghebruken, unde dat my van rechte toe hoert, alse by namen dat grashuys myt synen toebehoere unde al dat land, dat omme dat slot licht, erdeland unde ettinghe, dat my van rechte toe hoert. Item soe hebbe ick hem toestaen unde ghegheven alle heerlicheit unde recht nae utwysinghe des lantrechtes, broeke, vyntgued unde allent, dat ick unde he unde syn broeder myt dem swerde befuchten unde ghewonnen hebben, dat sal he ghebruken in aller wyse als ick ghedaen hebbe. Item soe sal Ulrick unde Foelcque voerscr, my van dem slote unde van dem guede volghen laten myne lyftucht unde renten, soe ick die nue ter tyt hebbe, unde mynen willen daermede doen laten. Unde wen myner toe kort worde, ofte wen ick my in een cloester gheven wolde, soe sullen he unde se allykewal my volghen laten myne rente unde gued alst voerscreven is. Item soe sal Ulrick unde syn broeder voerscr. beschermen unde bystandich wesen van der borch, soe he aldus langhe ghedaen heft myne vrunde unde by namen Ghelen mynre dochter unde die Fredenbergher unde alle myne gheboren vrunde, die my in dat neghende lyt[*] toehoeren. Item weert sake, dat Folcque vorscr. storve unde ghene erfnamen na en liete, dat Got verbiede, unde Ulrick sick veranderde myt enen anderen wyve, soe sal he yo allykewal der borch mechtich wesen unde ghebruken he unde syn erven oft on God toe erven hulpe, unde yo allykewal myne vrunde daervan beschermen, alst vorscr. is. Oick oft he sick nicht voranderde unde ghene eerfnamen en kreghe, unde Cybe unde Onne sick verbeterden unde erfnamen kreghen, soe sal he oen nae synen lesten der borch ghunnende wesen. Item soe begheer ick van hem, alsoe ick hope, dat he wal doen sal, dat he allen godeshusen unde der geystelicheit behulpelick unde bystandich wesen wyl in erem rechten unde gueden, dat on van rechte toebehoert unde bort, dat se nerghen an verkrencket en werden unde he nae doe, als ick voer ghedaen hebbe, unde dat oick die huysman nicht veronrechtet en werde van der geystelicheit unde van hem selven. Item soe sullen Ulrick unde Foelcque myn dochter vorscr. na mynen dode alle jare myn jaertyd beghaen myt offer unde jaertyden, soe sick dat behoert unde boirt in der helighen kircken. Alle arghelist utghesloten. In orkonde unde tuych der waerheit desser vorscr. dynghen, soe hebbe ick Wypte vorscr. mynen ingheseghel doen hanghen an dessem brief. Unde om meerre sekerheit unde vestinghe al desser vorscr. dynghen, soe heb ick ghebeden dem eersamen manne heren Poptatum, abt toe Noerden, unde heren Hayng unde heren Eylard, kircheren toe Esenze, dat sy ore inghesegelen hebben mede doen hanghen an dessen brief. Unde oick bysonderlinghe heb ick ghebeden den eersamen prior unde convente des cloesters Marienkamp van der regeliers canoniken oerde, gheleghen in dem kerspel van Esense, dat sy om meerr sekerheit unde waerheit al dessen vorscr. punten oick mede oers convents segel hebben doen hanghen an dessen brief. Ghegheven in den jaren ons Heren dusent vierhondert unde viertich, op sancti Vitalis dach des helighen martelers.

x

x

Fonds	Ostfriesisches Urkundenbuch, I
Fol.nr.	S. 456
Nr	513
Olim	Orig.: Grosse Urk.-Sammlung Nr. 41. Hier auch eine Abschrift des Emmius und 2 andere Abschriften. — Msc. A. 1. Fol. 310v. Msc. A. 56. Gedruckt Harkenroht S. 309, Matthaeus S. 283, Lünig XXIII. S. 1871.
Jaar	1440
Datumcode	Vitali

x

x

x

Commentaar

Siegel: 1. Fehlt. 2. In grünem Wachse, spitzoval, ein Geistlicher, in der R. den Stab, in der L. die offene Bibel. Umschrift: .....batis.....in Nord... 3. Ein Engel, ohne Arme, vor ihm ein Wappenschild oder Tuch mit dem Christuskopf. S. domini Hay . . curati in Ezense. 4. Ein E mit Krone darüber. S. Eilardi curati in Norden. 5. Spitzoval, schlecht erhalten. Unter goth. Baldachin die Jungfrau Maria mit den Jesuskinde. Die den Baldachin tragenden Pfeiler rechts und links durchbrochen durch eine Nische mit je einem betenden Engel. Von der Umschrift sind nur die Buchstaben Marien . . . zu erkennen.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 513