| Nummer:oub0531 | Datum:18. Jan. 1442 | Overlevering:Editie | Vindplaats:Ostfriesisches Urkundenbuch, I, S. 469, nr. 531 |
Mehrere Ostfriesische Häuptlinge verbürgen sich bei Junker Ulrich dafür, dass der Häuptling Friedrich Haren zu Larrelt, von dem zugleich bekundet wird, dass er seines ganzen Erbes verlustig erklärt sei, sich pünktlich zur Haft stellen werde, sobald er dazu aufgefordert wird.
Wy Jawen tho Petckum, Tanno tho Borssum hooftlinge, Enno Widzaldes, Thiarck Boyen tho Osterhusen und Lyowert tho Uttum bekennen und betuigen klaerlicken in der waerheyd vor allesweme mit krafft disses brefes, dat wy mit samender hand in gueder trouwe sind borge geworden und hebben gelovet deme eerhafftigen juncker Ulricke tho Emden, Norderlande, Esens und Awercke etc. hoofftlinge vor Frederick Haren tho Larrelte, dat he juncker Ulricke vorscr. offte sinen erven sall inkoomen na erer begeeringe, wanneer see em inesschen und vormanen gelick eer vangen man; weer, aver, dat he des nicht en dede off doen wolde, so scholen wy vorben, borgen und willen juncker Ulricke edder sinen erven untrichten und geven in guder betalinge dusent Rynsche gulden sunder jenigerley wederspraeke. Hierboven schall Frederick vorscr. tegen juncker Ulricke edder sinen erven verboord und verbraeken hebben al syn und syner huesfrouwen erve, waer dat gelegen ist, In orkunde der wahrheit sunder alle argelist, so heb ick Wierd tho Uphusen hoofftling myn ingeseegel um Jawen wille vorscr. hiertho gehangen, und ick Tanne bruke myns sulvs ingeseegel. Ock so hebbe wy Enno, Tiarck und Lyowert vorbenoemt vrundtliken gebeden Otto Schroder borgemeester tho Emden und Hinrich Kumpanye um der borger inseegel, dat see mit guden willen mede hebben hangen heten tho dissen brefe. Geven na der boort Christi dusend veerhundert daerna an dem twee und veertigsten jahre, des donnerdags na sunte Anthoni heremite.
