| Nummer:oub0564 | Datum:29. Sept. 1444 | Overlevering:Editie | Vindplaats:Ostfriesisches Urkundenbuch, I, S. 494, nr. 564 |
Die Grafen von Oldenburg und Delmenhorst versprechen, die Häuptlinge von Knyphausen und Jever ferner in ihrem Schutz behalten zu wollen.
Wy Nycolaus oldinges ertzebiscopp to Bremen, Kersten, Mauricius unde Gerd, greven to Oldenborch unde Delmenhorst, bekennen unde betugen in dessen breve openbare vor allesweme, dat wy uns geloffliken hebben togedan to Lubben Onneken to Knipense unde Tannen unde Sibete, broderen, to Geyer hovetlingen, dat wy en schullen unde willen gastlich unde bistendich wesen, dar wy erer mechtich zynd to eren unde to rechte. Ok so scholen wy unde unse man unde undersaten see offte ere undersaten nicht beschedigen noch beschedigen laten dor unse lande unde herschop, sunder dat keren unde weren na alle unten vormoge, dar wy erer mechtich zyn, so vorscreven steil. Were ok sake, dat se to unsen mannen ofte undersaten wes to seggende hedden, de wyllen wy en bestellen to rechte to nemende unde to donde na gebore; ok so scholen wy se laten by aller rechtigeit na utwisinge der breve, de en greve Diderik seliger dechtnisse unse bole[*] unde vader vorsegelt heft unde oft wy jenige breve vorsegelt hebben van Sybete unde anderen Vresen ute Rustringen, Ostringen unde Wangen, de breve scholen alle by erer vullen macht bliven, unde den en schal desse breff nergen an entiegen wesen, unde desset vordrach schal stan to teyn jaren van gifte desses breves; desset loven wy heren vorgescreven in guden truwen stede, vast unde unvorbroken to holdene sunder argelist; unde hebben des to mereren bewisinge unse ingesegele hangen heten to dessen breve. Na Godes bort dusent verhundert, darna in deme ver unde vertigesten yare, am hilgen dage sunte Michaelis.
