Der Grosskomthur des Johanniterordens in Westfalen erhebt das von Goldhorn getrennte Heiselhusen zur eigenen Komthurei.
Wy broder Bernt van Schedlike, balyer up Westphalen unde commendur des huses to Stenvorde unde mester van Vreeslant, ordens sunt Johans baptisten des hospitals van Jherusalem, broder Edzard unde broder Roloff commissarii unde ghemene commendurs in Vreeslant, ordens vorg., doen kundich unde openbaer vor allen luden, de dessen breeff zeen eder horen lesen, dat wy de schelinge unde twygdracht, de ghewesen hevet tusschen her Folkart, commendur ter Golthorna, unde de ghemene conventeslude desselves conventes by de ener ziit, unde her Acken ende de ghemene broders ende susters des huses to Heseldahusen by der ander ziit, welker Heseldahusum een vorwerck in vortyden des conventes tor Golthorna plecht te wesene unde van den convente ghestichtet, in unsen ghemenen capittel to Groninge in een vast vrentscap unde zoen hebben weder lusschen beyden parten ghemaket ende ordinert in punckten hiirna ghescreven. Int erste dat Heseldahusen zall en hues ewych by em solven wesen unde blyven, als ander convente unde huse under horsamheyt des vorg. mesters, unde sollen alle yaer gheven in dat hues to Stenvorde vor[*] or respons dre Rynsche ghuldene unde nicht meer, doch[*] zo zal men van den vorg. husen alinck capittel denen, ghelick ander huse, unde darmede sollen ze vrentlike van malcanderen ghescheyden wesen to ewyghen tyden; hiir hebben an ghelyet beyde part vorg. In orkunde der waerheyt, dat desse vrentscap unde punckte solden werden gheholden, so hebben wy mester Bernd vorg., broder Edzard unde Roloff vorg. unse ingheseghele upt spacium desses breves beneden anghehangen. Ghegeven in den yar unses Heren dusent verhundert ses unde vertich, up sunt Margareten avend.
x
| Edities |
E. Friedländer, Ostfriesisches Urkundenbuch I (Emden 1878), nr. 574 |
