| Nummer:oub0581 | Datum:29. Juli 1447 | Overlevering:Editie | Vindplaats:Ostfriesisches Urkundenbuch, I, S. 509, nr. 581 |
Häuptling Ulrich von Norden usw. schlichtet einen Streit zwischen Abeko Wierdsna und Gerd zu Petkum wegen des Erbgutes ihrer Grossmütter, des Loppersumer Heerdes.
Ick Ulrick, to Norden, Brockmerlande, Emeden, Ezense, Awerke unde Lengen etc. hoeftling, bekenne unde betuge clarliken in der warheit vor allesweme in krafft desses breves, dat ick na rade unde vulbord des ersamen Wierdes to Uldersum unde Uphusen unde Sybrandes to Edelsum hovetlinge hebbe leefliken unde vruntliken ghescheden in desser nabescreven wise sodane schelinge, unwille unde twidracht, alse in vortiiden is ghewesen twisschen Abeko Wierdsna bi der ene unde Gherd to Petkum bi der anderen syde van ere twier oldemoder erve weghen, dat dar hord to Lopsummer herd unde war dat anders gheleghen is. So dat Abeko unde Gherd vorscr. scholen dit vorb. erve samentliken mit vreden unde ghemake buken like mechtich van beiden tziiden sunder yenigerleye argelist, hulperede unde nye vunde. Des to tuge hebben hiir yegenwordich mede bi an unde over ghewesen Imelo Haringha voged to Emeden, junghe Erd van Thornum[*] landrichter in Emsinghelande unde anders vole guder lude. In orkunde der warheit so hebbe ick Ulrick vorscr. myn ingesegel mit witschop unde mit gueden willen hangen heten to dessem breve, dar ick Johannes provest unde kerckher to Emeden myn ingesegel umme vruntlike bede willen desses vorb. Abekens mede hebbe bi hangen laten, want my de sake witlick unde kundich is unde hebbe ghewesen mede over desse schedinge. Datum na der borth Cristi MoCCCCoXLVIIo yar, des saterdages vor ad vincula Petri.
