| Nummer:oub0587 | Datum:4. Dez. 1447 | Overlevering:Editie | Vindplaats:Ostfriesisches Urkundenbuch, I, S. 513, nr. 587 |
Propst Johannes Vredewold zu Emden verkauft dem Kl. Langen das von dem Kl. Dokkum angekaufte Vorwerk Bohnenburg für 600 Rhein. Gulden.
Ic Johannes Vredewolt provest unde kercheer to Eemden bekenne unde betuge mit dessen openen breve, dat ic heb vercoft ende vercope teghenwordich den vromen besceyden heren here Sybrande provest to Langen, heren Mathias prior daerselves ende den gansen cloester[*] dat voerwerck to der Bonenborch[*] in allen manieren ende wys mit al synen tobehoer ende rechte, so ic dat hebbe gecoft van den eersamen heren hern Wilhelme, abbet to Dockum, [*] ende syne kelner heer Jacob na inholt der brieve, de de voerscreven abbet mii daerup sal geven; zo dat ic updreghe ende overgheve den voerscreven provest ende synen convente to Langen dat voerscr. voerwerck voer seshondert golden Rynsche gulden, teyn R. gulden min. Daer he mii de yerste viiftich van sal betalen to Paeschenachten naestcoemende, [*] ende daerna to sunte Merten naestcomende hondert R. gulden, ende daernae to sunte Merten over een jare naestcomende hondert R. gulden. Ist dat ic neme steen van hem, de sal staen tot de ander viiftich R. gulden, de in dessen driehonderden breken; neme ic oec ghenen, so sal hii mi de laetste viiftich oec betalen binnen dessen tween jaren; voer de ander dreehondert R. gulden sal ic jaerlics boeren achtien R. gulden beth do der tiit, dat hee ofte syn convent de vrii copen sen gulden mit hondert. In een oerkunt desser waerheit hebbe ic myn segel aen dessen brief ghehangen, in jeghenwoerdicheit heren Reyners vicarius to Eemden ende Otte Scroeders daerselves borghemeysters. Int jaer uns Heren MoCCCCoXLVIIo, op sunte Barbare dach.
