| Nummer:oub0619 | Datum:Larrelt, 20. Aug. 1449 | Overlevering:Editie | Vindplaats:Ostfriesisches Urkundenbuch, I, S. 541, nr. 619 |
Reynst, die Tochter des Propstes Hisko von Emden, verkauft an den Häuptling Enno Edzards von Norden usw. ihr Heirathsgut, nämlich 53 Grase Landes, das Hiskenge Erbe, im Visquarder Hammrich für 180 Arensgulden.
Wytlick kundich und openbar sy allen den ghenen, de dessenn breff syen edder horen lezen, wo dat ick Reynst, Hyskens hovetlynges dochter wandages provest to Emeden, bekenne und betuge clarlike in der warheyt vor alsweme, dat ick myt mynen vryen willen und vorberadene mode, myt willen, radt und volbordt myner vriende, hebbe verkofft rechtverdisches kopes und vorkope jegenwordich in kracht desses breves deme erberen manne Enno Edzards van Norden, hovetling tho Greetsyel, mynen neven, dree und vyfftich grasen landes gelegen in Vuskwerder hammerick, gheheten Hyskenge erve und landt, vor eyn summe geldes, alzo negen stigen Arensgulden, vyfftheyn krumster to rekenen vor einen Arensgulden, als do genck und geve weren und noch sint in den lande, dar my vul und al wel is betaelt den yrsten pennynck vor den letsten na mynen vullen willen. Welcke vorscreven erve und lant is myn rechte bruetskaet, dar my ghegheven is van mynen vader und moder. Waerumme so geve ick Ennen hovetlinge vorbenompt und synen rechten erven, boren edder ungheboren, eren vullen vrien willen, dit vorscr. landt to bruycken, vorkopen, vorwesselen, vrye und quitet vor my und vor mynen rechten erffnamen, boren edder ungheboren, tot eren willen, zo dat ick offte nummene von myner wege hyr kegen mach edder scholen spreken in tokomende tyden; men desse koop schal stede und vaste blyven na desser tyt sonder mynen und myner vrunden wederropen, und alle ansprake, alle archelist und nye vunde utgesecht. Dess to tuge so hebben dar jegenwordich mede, by, an und over ghewesen in deme kope und betalynge des vorschreven landes to Hlerte in Foelke Habben huess und den wynkop mede gedruncken beyde geystlick und werlick, by namen her Hero kerckhere, her Jacop vicarius, Ubbe Habben, Poeptet Popkma, Eppo Ewerska, Ollko Campus, Sybo Rycken buerluyde to Herlte vorscr., Hezo Gaykema in der Greet und Wato Ubbena to Viskwert und Keno to Trymhusz[*] und anders veler guder luden. In orkunde der warheyt und merer tuichnisse so hebben wy zametliken gebeden vruntlicke deme ersamen provest her Sybrant to Langen, her Hero kerckhere und her Jacobum vicarium to Hlerlt vorscr. umme yre inghezegele, de se witliken und mit guden willen hebben gehangen an dat spacium desses breves. Na der boert Christi dusent veerhundert negen und veertich, up sunte Bernhardi dach abbatis.
