| Nummer:oub0621 | Datum:2. Jan. 1450 | Overlevering:Editie | Vindplaats:Ostfriesisches Urkundenbuch, I, S. 542, nr. 621 |
Aufzeichnungen zum Kloster Langen.
Kl. Langen. Notum sit omnibus presens scriptum legentibus, quod anno salutis nostre Mo quadringentesimo quinquagesimo, in octava sancti prothomartiris Stephani, secundum sanctorum sanxiones patrum ac regularium constitucionum conventuales utriusque sexus in Langhen uniformiter elegerunt venerabilem dominum Aytatum de Hlert, curatum in Twixlum, in eorum prelatum et pastorem. Magno igitur labore pedestri de monasterio sancti Jacobi profectus est et Deo propicio Premonstratum solita via prospere pervenit. Et cum benigne ab abbate Premonstratensi exceptus esset, narravit de electione in monasterio sancti Jacobi de eo canonice celebrata et quod invitissime fecisset, es quod mulier et quies nunquam habitant sub eodem tectu. Quapropter abbas Premonstratensis, tanquam pius pater volens caritative animarum periculis occurere et conventui prenominato indempnitatibus providere, ne cursibus opprimeretur malignorum, imo electionem seu postulacionem sic canonice celebratam confirmavit, ratificavit, approbavit, approbatamque ab omnibus conventualibus prenominati conventus in Langen teneri voluit. Insuper omnibus et singulis ipsius cenobii in Langhen canonicis et personis utriusque sexus nobis et ordini nostro subditis tam presentibus quam futuris in virtute salutaris obediencie et sub penis in statutis nostris sepedicti ordinis nostri contentis firmiter et districte precipiendo mandavit, quatenus suo prenominato preposito domino Aytato in omnibus et super omnia reverenciam et honorem deferant et humiliter obediant sicut eorum proprio pastori et prelato.
