| Nummer:oub0628 | Datum:25. Juli 1450 | Overlevering:Editie | Vindplaats:Ostfriesisches Urkundenbuch, I, S. 547, nr. 628 |
Asse Reedsna zu Wybelsum schenkt dem Kl. Langen 6 Grase im Wybelsumer Hammrich und bedingt sich auf Lebenszeit eine Pfründe im Kloster und nach ihrem Tode eine Leichenfeier, wie einer Nonne zu Theil wird, aus.
Kundich unde openbaer sy alle den ghennen, die dessen brief sien ofte hoeren lesen, woe dat ic Asse Reedsna to Wyvelsum bekenne unde betughe voer alle gueden eerbaren luden, de nu synt unde comen moeghen in toecoemenden tiden, dat ic gaende unde staende by sunden unde machtighen live, mit vrien wille hebbe overghegeven unde opgedraghen, geve over unde opdraghe yeghenwoerdich om salicheit mynre zielen unde mynre vrienden den convent to Langen ses grase landes ghelegen in Wyvelsummer hamric, de vier grase in die luttika Pennum by de Pennewey unde twe grase in de Langhawarra by de Bregwey to dat ander lant, dat ic hem eer gheven hebbe, een provenne in dat convent voerbenoemet tho hebbene dewyl dat ic leve, ende na mynen dode de begravinghe myns lichams my to begaende ghelyek als een suster in dat convent, ewylike voer myne unde mynre vriende zielen to bidden; welch voerscr. lant mach dat convent voerscr. vrii ende veylich bruken, verhueren, vercoepen, verwisselen to eeren wille unde nutticheit sonder mynen unde myner vrienden wederroepen unde aensprake, alle argelist unde nievonde utghesproken. In een orkunde der waerheit so heb ic Asse voerbenomet leefliken ghebeden heer Heerman unde heer Wilko, kerckheeren to Geerdsweer unde to Langen, umme eer inghesegel, unde wy priesters voerbenomet um beden willen Asse voerbenomet hebben onse ingheseghel witliken ghehanghen to dessen breve. Gescreven int jaer ons Heeren MoCCCCo unde viiftich, up sunte Jacobs dach apostel.
