| Nummer:oub0652 | Datum:1452 | Overlevering:Editie | Vindplaats:Ostfriesisches Urkundenbuch, I, S. 567, nr. 652 |
Testament der Houwe Hedden (zu Burhave).
In nomine Domini. Amen. In deme jar unses Heren do men scref 1452, [*] do sette ik Houwe Hedden dyt testament myt beradene mode unde myner viif synne vulmechtich vor deme hilligen sacrament unde ynneghen werdicheyt mynes kerkheren her Gomel unde yn jegenwerdicheyt heer Folf, kerkhere to Burhove, [*] unde ik to der tyd anders nicht en wuste mer to der gnade Godes to komende. In dat erste so geve ik al dat arve, dat ik hebbe to Nyendorpe, [*] dat dar brukende ys Yno Hayen, Thet Ayben unde Hayke to Kyppenze, [*] de he(l)ft meed hammer(!), de darto horende syn, unde Hay Renedes, de dar ock van brukende ys, dat ik doch hebbe gegeven yn vortyden by sunden live unde myt beradene mode yn Butefoder[*] kerken vor den hogen altare unde wol 8 jar tovoren, des nam ik to tughe heer Gomel mynen kerkheren, Yne Mammen, Meynse Ayben, Tyarht Wergnissa, Here Tyarsna, Yne Wyertnissa, Wylgrip Eylert syn sone etc., unde dyt vorscreven arve, dat scholde yo bliven by der kerken to Butafoda, unde dat ik nu vullenkomen afirmere vor deme hilligen sacramento. Item sancto Floriano to Burhove 1 dimed landes to Kyppen unde 20 Arnske gulden van Erskna herda, [*] dat Hayke Hefridac schal Jabbe uetgeven. Item Mauricius kynder unde Yabbe Ynen, de scholen mydden yntwy delen dat arve, dat dar ys geheten Ayben hert.[*] Item Merhuser monneke de scholen hebben Heer Ammen land; wyllen se dat geven to lozende, so scolen Mauricius kynder dar alderhemelekeste to wezen. Item Jabbe Gomelen, de schal hebben 5 dymede to Nyawerven.[*] Item Mauricius kynder, de scholen hebben dat erve dat Bene Gunnen, Folkert Ghunnen unde Hay Hanzen brukende synt unde 12 dymede by Mesteder[*] Herle. Item Jabbe Ghomelen, de schal hebben dat arve to Funnkze, [*] dar schal af hebben sunte Peter to Bremen 20 Rynske gulden. Item Ezenser monneke, de scholen hebben 20 Rynske gulden, unde de 4 mendicantes enen yeweliken 10 Rinske gulden. Item junckher Sibo, de schal hebben to Beerden[*] 6 und 40 dymede sunder den werp. Item to Meerhuzen schal de krone. Item so heb ick 1 gordel van Zyrke, de steyt vor 20 Arnske gulden, dat geve ik to Ostryngevelde, dar mach he ene lozen. Item zo heb ik 1 golt wylster van Yne Galtetzen, dat steyt vor 15 Arnske gulden, dat schal to Bursmonneken;[*] kan he dat lozen, so schall dat vri wezen. Item Tuchermonneke[*] 15 Arnske gulden, dat schal uetgeven Tyart Werngnissa. Item to Meerhuzen 12 olde Postelatesgulden van Gert to Petkem vor enen gordel. Item grote Kankene 1 krusgede sesting. Item heer Tyart to Awerke 1 bed, 2 laken, 2 bolster unde 1 benckpole. Item dat span geve ik to Yle, dar schal Jabbe Gomelen afhebben de helffte, up dat he myn testament helpe to vorderende unde nicht to straffende edder yeghen spreken. Item her Ghomele 8 Arnske gulden. Item her Folf 1 R. gulden, Item unser leven Vrouwen to Butaforda 1 Rynsk van 40 Rynsk gulden. Item sancto Floriano to Burhove 12 lichte gulden van Aybe Roewen unde van Tede to Bassenze[*] 12 krumstert. Item dat smydewerk uppe den 2 rokken unser leven Vrouwen to Butafoda uppe den kasel.[*] Item so geve ik Aybe Ynen de arve to Bassenze. Item so hebbe ik noch 3 guldene rynge unde den rote sestyng, der scholen de testamentarii unde Here Mauricius vormunder to wezen, dat men dat geve in kercken unde yn cluzen, dar men dat aldernuttest bedenken kan. Item alle ander guder, de unvorgeven synt, dar scholen Her Mauricius kynder vormunder to wezen. To dusseme vorgescreven puncte unde testamentes, so hebbe wy her Gomel unde her Folf vorghescreven, Onno to Nyendorpe, den se darsulven to keesen heft, an unde over gewezen. Ock to merer betuchnisse so hebbe wy her Gomel unde her Folf unser beyde ingesegel gehangen uppe dat spacium desses testamentes, dat dar ghescreven ys ynt yar unses Heren, ut supra.
