Eine Anzahl hervorragender Ostfriesischer Geistlicher und Laien bekundet unter Darlegung der genealogischen Verhältnisse der Emder Häuptlings-Familie, dass Abeko Beninga, Häuptling zu Loppersum, und Gerd, Häuptling zu Petkum, ihr Erbrecht an Emden, Jeder sein Drittel, als Junker Ulrich abgetreten haben.

Wy Johannes Vredewold, decretorum doctor, provest to Emeden unde kerchere to Groningen, Sibodus decretorum doctor, kerchere to Marienhove, Sibo to Esenze, Stedestorpe unde Witmunde hovetling, Heuwo commenduer to Jemmegum, Bebbo provest unde kerchere to Grotehusen, Johannes Ludemann to Emeden, Albertus to Hagen, Isebrandus to Hlerlt kercheren, Reynerus vicarius to Emeden, Ocko to Lockwarden, Beno to Otthum hovetling, Emo to Norden, Egbeth to Emeden vogede, Johann van Dutem, Johan van Winsem, Meio Tyadmersna unde Abel, borgermestere, Remet Redersna, Alberd Thiitkens unde Hinrick Smyd borgere to Emeden, enkennen unde betugen openbaer an dessem breve vor allen ersamen vromen luden, de ene zeen, horen offte lezen, woe dat ame jare unde dage nabescreven vor uns samptliken syn gekomen Abeko Benynga to Lopsum unde Gerd tho Pethcum hovetlinge, doesulffs vor uns rekende, uthvorklarende unde bekennende myd vele guder lude unde scrifft witlicheyt unde bewisinge ere angeborne recht unde maechtal, dat ze went up dessen nagescreven dach to deme slote unde herde to Emeden unde der tobehorende herlicheit hebben gehad, welke rekenscap der maechtael unde erffnysse vorscr. ze als hiirnae bescreven steyt begont unde voergebracht hebben: so dat dar is in vortiiden gewesen eyn ersam hovetling to Emeden geheten Luwert, de hadde ene husvrowen genomet Fosse, welke bede[*] telden veer zons, geheten Frederick, Wiard, Campo unde Luward, unde de Campo ward geslagen to Lopsum, unde en leeth nene erven nae. Frederick toch Igen, Thien husvrouwen to Ditsum. Ige vorscr. toch junge Igen, Gerdes vorscr. moder. Wiard droste telde junge Wiard, unde junge Wiard telde Abeken vorscr. moder, Riickwe genompt. Luward de verde broder telde Hisken, unde Hiske telde vord Imelen unde Reynsten. Imele leeth nene erven nae, Reynste vorbenomed telde Eggen tom Westerwolde hovetling. Uth welker vorben. rekenscap unde telingen wii unde alle vrome vorstendige lude irkennen unde merken mogen, so dat de vorb. Abeke, Gerd unde Eggo to liikem dele, alze to dren perlen to deme slote unde herde to Emeden unde syner tobehorende herlicheyt van dren broderen uthgespraten unde getelet syn, unde vormyddes erer mederekenden getelden personen vorschyne unde dode de rechten erffnamen to likem dele to dessem slote unde herde to Emeden unde syner herlicheyt geworden syn, unde nement de leven desse rekenscap unde erffnysse anders, den vorscr. is, bewisen mach off kan, so wii doesulffs vorstaen hebben. So isset dezulven vorben. Abeko unde Gerd myd vrigen guden willen unde vorberaden mode unde umbedwungen vor uns allen vorben. ere angevallen deel unde erffnysse, alze eyn idlick synen darden vullen pard, an deme vorb. slote unde herde to Emeden unde der herlicheyt vor sick unde ere rechten erven unde anerven, geboren unde ungeboren, deme edelen, walgebornen juncheren Olrike toe Gretziil, Norden, Auwerke, Emeden, Berum etc., in Ostvriesland hovetling, unde synen rechten erven, geboren unde ungeboren, to ewigen tiiden erfflick egen to holdende, to besittende, to brukende, synen erven vordan to ervende, myd hande unde myd munden upgedregen unde gegeven hebben unde vorlaten sonder jengerleye uthwisinge offte beschedinge jenger dele, behalven erve unde werve, de ze nu tor tiid vrig in besitte hebben to desseme vorscr. herde horende, de willen zee unde schullen umbekummert holden unde to erem besten bruken vrig, ledich unde loss, unde anders nycht uthgescheden. See dat de vorb. juncher Olrick sodane twe parte desses vorscr. slotes, herdes unde herlicheyd mach vredeliken bruken, synen erven vord erven, vorsetten off vorkopen, woe eme unde synen erven dat belevet unde beqweme is, sonder des vorg. Abeken offte Gerdes off erde erven offt jemendes van erer wegen rechte biisprake. Ock hebben de vilgenanten Abeke unde Gerd doesulffs vor zick unde ere erven gensliken vor uns vortegen, unde wii Abeke unde Gerd vorscr. vortigen ende vorlaten jegenwordich in ende myd krafft desses breves alle rechte, beyde ghestlick unde wartlick, de uns an tokomenen tiiden mochten off konden to desseme vorscr. slote, herde unde herlicheyd vorscr. denen offt to hulpe komen, so dat wii unde unse erven, offte nement van unser wegen, de tegen den upgenanten juncheren Olrike offte syne erven in tokomenen tiiden hiirtoe nycht bruken willen off schullen, unde ock ghene hulpe uth den vorscr. rechten hiirtegens to sokende sonder jengerleye argelist, hulperede offte nye vunde. Desses tor kentnysse so hebben wii Abeke unde Gerd hovetlinge vorg. unse rechten zegele myd guden willen unde umbedwungen vor uns unde unse rechten erven, boren unde ungeboren, witliken hangen heten to dessem breve. Unde heben vorder to merer tuchnysse unde vullencomen bewisinge der warheyd gebeden de erwerdigen gloriosen doctores mester Johann unde mester Siben vorben., unde desse upgenanten erbaren vromen heren, hovetlinge unde personen, alze bii namen juncher Siben, heren Heuwen commenduer, heren Bebben provest, heren Johann to Emeden, heren Alberde to Hagen, heren Isebrande to Hlerlt, kercheren, heren Reyner vicarium vorscr., Ocken to Lockwarden, Benen toe Otthum, hovetlinge, Emen to Norden unde Egbet to Emeden, vogede, umme ere rechten ingezegele, unde Johann van Dutem, Johann van Winsem, Meyo Tiadmersna unde Abelen borgermestere vorscr. umme der stad to Emeden zegel, se de upgenanten segele eyn idlick dat syne umme unser vruntliken bede willen wolden mede bii unse zegele vor dessen breff doen hangen, dem wii alle vorscr., nae deme male alle puncte desses breves an unser jegenwordicheyt, so vorscr. staen, vorhandelt syn, so under unseren ingezegelen ...[*] gedaen hebben hiir an to hangende. Datum anno Domini M^oCCCC^o sexagesimo, ame negesten mandage na deme hilgen cruce exaltacionis. De vorbenante Campo was halffbroder, unde hadden enen vader.

x

x

Fonds	Ostfriesisches Urkundenbuch, I
Fol.nr.	S. 659
Nr	763
Olim	Orig.: Grosse Urkundensammlung Nr. 75. Regest.: Msc. 92 der Ostfries. Landschaft — Gedr. Brenneysen S. 82.
Jaar	1460
Datumcode	LpExaCru

x

x

x

Commentaar

Siegel: 4. Ein Kelch. S. Sibodi de Grimessum. 5. Wappenschild init rechtsschreitendem Bären. Helmschmuck: Lilie. S. Sibodi capitalis de Dornum. 7. Gothisch, ein Geistlicher mit Mitra, in der R. einen Schlüssel, darunter ein Pelikan. S. Bernardi (?) . . . . prepositi in Husum. 8. S. Johannis corati (!) in Emeden. 9. Geistlicher in Nische: S. domini Alberti....in Hage. 11. Ein Engel, der ein Wappenschild mit drei Rosen (2. 1) und in der Mitte einen sechsstrahligen Stern vor sich hält , S. Reineri.....12. Ritter mit dem Lindwurm. 16. Stadtsiegel.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 763