| Nummer:oub0829 | Datum:11. Sept. 1465 | Overlevering:Editie | Vindplaats:Ostfriesisches Urkundenbuch, I, S. 717, nr. 829 |
Ulbet Hayenna zu Hosingwehr verkauft dem Kloster Dykhusen 17½ Grase Landes im Visquarder Hammrich.
Wytlick, kundich unde openbaer sy allen eersamen erbaren vromen luden, de dessen breef zeen edder horen lezen, woe ick Ulbet Hayenna toe Hosinckwerum[*] enkenne unde tughe voer allesweme yn dessem breve, dat ick myt vryen willen, vorberaden consent unde volboert myner echten huusvrouwen, hebbe verkoft ende verkoepe jeghenwordich in unde myt kraft desses breves toe enen steden vasten ewighen unverbroekenen ervekoepe den gheestliicken doeghetsamighen susteren des convents toe Dyckhusen van sancti Dominicus[*] orde, achtendehalf gras landes, gheleghen yn Fysckwerder hammerick, soe gheheten yn da Stada, voer ene summe gheldes, de my degher unde al guetlycken wol is betaelt, de eerste penninck myt den lesten, des ick em dancke; unde weer yemant, de up dyt vorscr. erve yenighe ansprake edder anclaghe wolde doen, zo wyl (ick) Ulbet vorscr. unde sal, edder myne rechte erfname, boeren off ongheboeren, dessen erghenamten susteren edder oren nakomelynghen, boren of ungheboeren, dytselve lant vry qwiit unde schadeloes warende wesen voer alle ansprake beyde myt gheestlycken unde wertlicken rechte, alle arghelist hulperede[*] unde nyefunde utghesecht. Des tho tughe hebben hiir mede by an unde over ghewesen Frederyck Habbenna toe Pylsum, Haytet Harenna, Haytet Feckenna to Fisckwert, Focko Abekenna unde anders vele gueder lude. In orkunde der waerheit, so heb ick Ulbet vorscr. vruntlicken ghebeden heren Sybrant van Pettcum, mynen kerckheren toe Eddelzum, dessen breeff van myner weghen toe beseghelen, dem alsso witlichen ghescheen is. Na der bort Christi MoCCCCoLXVo, ipso die Prothi et Jacincti.
