| Nummer:oub0858 | Datum:15. Dez. 1467 | Overlevering:Editie | Vindplaats:Ostfriesisches Urkundenbuch, I, S. 747, nr. 858 |
Der junge Sebe Rennerkenna zu Eilsum verkauft dem Propst zu Hinte und Häuptling zu Grimersum Aild Beninga 2¼ Grase Landes im Canumer Hammrich, die Immingameede.
Witlick, kundich unde openbar zii allen vromen luden, de dessen breeff zeen offte horen lesen, wo ick junge Seben Rennerkenna, inwoner to Edelsum, enkenne unde tuge vor allesweme in dessen breve, dat ick myt vrien willen, wolberaden mode, myt consent unde volbort myner echten husvrouwen, hebbe vorkofft unde vorkope jegenwordich in unde myt crafft desses breves to enen steden vasten ewigen ervekope deme ersamen Aild Beningha, provest to Hint, hovetling to Grimessum, twe grase und een veerdendeel landes, gheleghen yn Kaningumra hammerck, gheheten Immyngameed, na uethwisinge des beseghelden breves, den her Jarrich, kerckhere to Peuwessum, unde her Remet, kerckhere to Kaninghum, hebben beseghelt, vor ene summe gheldes, de my degher unde all guetliken wol in betaelt, [*] de erste pennynck mitten lesten, des ick em dancke; und weer yemant, de up desse twe grase landes unde dat verdendeel yenige ansprake edder anklage wolde doen, zo wil ick junge Seben vorscr. unde scal edder myne rechte erffname, boren unde ungheborn, Aild ergenant edder sine kinderen unde rechten erffnamen, boren unde ungheboren, ditsulve lant vry, quiit unde schadeloes warende wesen vor allen rechte, alle argelist, hulperede unde nyefunde uethghesecht. Des to tuge hebben hiir mede bii an unde over ghewesen her Haytet, prebendarius to Grimessum, Haytet Harenna, Abo Hickenna, Lutet to Kaninghum unde anders vele gueder lude. In orkunde der warheit, zo heb ick junge Sehen vorscreven vruntliken ghebeden hern Siibrant van Pettcum, mynen kerckheren to Edelsum, dessen breeff van myner wegene to beseghelen, dem alzo witliken ghescheen is. Na der bord Christi Mo CCCCoLXVIIo, des dinxtdages na Lucie virginis.
