Der Abt von Ihlo bekundet, dass die Witwe Liuwards von Berum, Eva von Dornum, auf dem Todtenbette bekannt habe, die ihrem Manne von ihrem Vater Hero von Dornum als Lösegeld geliehene Summe bereits vor längerer Zeit von Junker Edzard von Greetsiel zurückerhalten zu haben.

Wy Gherardus van tolatinghe Gods abt to Ile, bekennen unde doen kundich ende openbair allen unde enen itliken besondern watterleye states een jewelick sy, woe dat de eerbaer weduwe Eve van Dornum, nalatene wedewe saligen Lyuwerdes to Berum, hevet voir uns unde den eerbaren unde ersamen tughen naghescr. bekandt unde vollenkomen toghestaen, dair se lach in erer kranckheyt, dat eer salighe vader Hero to Dornum hadde to vortyden eren saligen huesheren Lyuwerde voirscr. to lene ghegeven seven styghe Franckescher schylde, syck weder to lozene van syner vengescapp, unde des soe hadde de eersame unde vrome salighe junckheere Edzard, van Greetzyl, van Broeckmer unde Auricke etc. lande hovetling, oer guetlicken weder entrichtet und wal betaelt veerhundert lychter gulden, in den tyden ghenghe unde gheve, in den vorghenomede summe, so dat se eme ghedanckede unde hadde des to sulven tiid den vorben. Edzarde, synen broder unde alle syne erffghenamen unde frunde qwyd gheschulden, ledich unde loes, van der vorgen. gheleenden summen gheldes, unde wolde eme da gherne ene beseghelde breeff unde qwytancie dairup hebben ghegeven, dat doch to unde na der tyd beth upp datum desses brieffs versumet hadde worden. Unde soe schalt de eerbaere wedewe Eve voerben. up datum desses selven brieves qwyd, ledich unde loes de eddele (vrowen)[*] Theden, grevynnen in Oestfriesland, unde ere kyndere, junghe greven des landes, van alle ansprake der vakenbenomeder gheleender summen gheldes, w(en)t he eer wal betaelt weere van salighen Edzarde, na erer sam(wit)ticheyt, [*] als se oeck nicht anders en konde ... .; so dat nummende ghene ansprake en solde doen van erer weghene to jenighen tiiden uppe de eddelen grevynnen unde de junghen greven, noch uppe ere nakomelinghe. Weer sake, dat ere naeste frunde hyrenboven noch itlike ansprake jo wolden doen, so dat wolden meynen unde vornemen, dat sodane seven styghe Francker (!) schylde nycht all en solden wesen betaelt myt den veerhundert lychte goldene, so en scholde men ghenerleye wiis doch dairumme spreken edder manen uppe de eddelen grevynnen voirscr., junghe greven, unde ere ervenden effte nakomene, sunder mochte de doen uppe den heerd to Westerhusen. Sunderlingh begheerde se oeck, dat dair nummende ghene ansprake en wolde meer umme doen uppe yemande. Hyr weren mede by an unde over vor tugheslude, de desse ghetuechnisse unde belyenghe mede anhoerden van der voergh. Even, dat se nam up eer stervende unde lesten vaert, alze be namen de eerbaeren ende gheistelike priesteren Johannes van Tryer, kellener, Johannes Wyck byechtvader to Meerhusen, her Bernd capellaen, Abeke Enens, voghed to Auricke, suster Aeyde priorisse unde suster Thyade des[*] vorghen. conventes Meerhusen. Unde desses to merer tuechnisse witlicker waerheyt, so hebben wy Gherardus abbet voerghen., umme to sterkende de waerheyt unde van bede willen, unsen inghesegel ghehangen to dessen breve.
Ghescheen unde ghegeven na der boert Christi veerteynhundert jaer, daerna in deme tseventigesten jaere, des vrygdaghes vor Galle confessoris dage.

x

x

Fonds	Ostfriesisches Urkundenbuch, I
Fol.nr.	S. 770
Nr	892
Olim	Orig. im Archive zu Oldenburg.
Jaar	1470
Datumcode	VaGalli

x

x

x

Commentaar	Das sehr gut erhaltene spitzovale Siegel zeigt in gothischer Nische einen Geistlichen mit Tonsur, in der R. den Krummstab, rechts und links daneben springt ein gothischer Giebel mit Strebepfeiler und Dachreiter heraus. Umschrift: S. Fratris Gherardi abbatis scole Dei.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 892