| Nummer:oub0910 | Datum:13. Nov. 1472 | Overlevering:Editie | Vindplaats:Ostfriesisches Urkundenbuch, II, S. 11, nr. 910 |
Gerichtliche Beurkundung eines zwischen dem Kloster Langen und mehreren Bauern zu Bollingen errichteten Schiedsgerichts, um über ein streitiges Stück Torfmoor zu entscheiden.
Ic Herman ter Molen, een sworen richter ter Oyta des eerweerdigen unde hoechgheboren vorste unde heeren heren Henrick van Zwartzenborch, biscop to Munster, administrator der hilligen kerken to Bremen, bekenne unde betughe in dessen opennen bezegelden brieve, dat voer my ghekomen is en heghet gherichte, daer ic den stol des gherichtes mit mynen kore mit rechte beseten hadde, broder Cornelis, en keller des cloesters to Langen, unde sprack an van des cloesters weghen Folrike, Bolen, Eggen unde Aylten to Boldinghen umme torfmore, [*] de desser voerben. hoer olderen deme voerghenoemde cloester umme dechtnisse unde hoerre zielen zalicheit ghegeven hadde, unde de voerg. dat cloester dermede engheden unde afhendich ghemaket hadde. Daer desse beyde partie scedeslude to koeren, als by namen Wempe Moerman unde Wempe Pedems up des cloesters syd, Wichman Block unde Geert Smet up de anderen syt, de se daer na erer beyde volbort unde willen vrintliken umme scheyden na sodaner wise, dat een van den oldesten broederen ut den closter scal gaen op den moerre ende bekennen den ut na syner zielen zalicheit, als hy weet, zo veer als he den cloester toehoeret. So loveden desse voergen. wederom als Foelric, Boele, Egge unde Aylt voer sick unde hoeren erven deme cloester voerg. desses more rechte ware wesen voer al de ghene, (de) [*] to dessen to rechte comen wilt sonder arghelist. Hier weren an unde over kornoten des gherichtes Werneke Tydekinck unde Herman Rabedes; bistender unde scedesluden weren Wempe Morman, Wempe Pedems, Wichman Block, Gerd Smit, Bernd Asslink, Albert Goesen unde anders vromen luden ghenoch. In orkunde der waerheit heb ik Herman sworen richter voerg. myn inghesegel witliken in dessen brief ghehangen. Na Goedes bord Christi (sic) MoCCCCoLXXIIo, des niesten vridaghes na sunte Mertens dach episcopi et confessoris.
