Heiraths- und Mitgifts-Vertrag zwischen dem Grafen Erich von Holstein und Schauenburg und der Gräfin Heba, ältesten Tochter Graf Ulrichs und der Gräfin Theda.
To wetende, dat hute na der gebort Christi unses Heren dusent verhundert in deme vijff unde seventigesten jare, ame mijtweken negest na unser leven Frouwen dage orer gebort, dorch schickinge des almechtigen Godes, na forstliker wonheit unde na insate der hilgen kerken vorhandelt, gedegedinget unde gesloten in eijn hillich echte twijschen dem eddelen unde walgebornen junchern Ericke, greven to Holsten unde Schomborch eijns, unde der walgebornen juncfrouwen Heben, des eddelen juncheren Olrickes, greven to Oestfreslant selliger, oldesten dochter, anders dels, so dat de upgenante juncher Erick Gode almechtich to love unde to eren den landen van beijdentsijden to nut unde fromen, unde dat sacrament des hilgen echtes to vormerende, nijmpt unde hefft genomen de vorgenompten juncfrouwen Heben tor hilgen e vor sijne eliken echten rechten husfrouwen, unde de eddell unde walgeborne frouwe Teda, grevynne to Oestfreslant, or moder, scal unde wil demesulven juncheren Ericke geven vor eijnen brutschat achtedusent gude vulwichtige Rinsche gulden gijnge und geve, unde vor dusent gulden smijde, guldene unde sulvere klenode, dat yo wal dusent gulden wert scal sijn; wor des aver enbreke, dat mijt golde unde gelde to vorfullende; unde hijr ijs utbescheiden alle smijde unde klenode der upgenanten juncfrouwen echtliken behorich, unde dat or nu na desser tit mach gegeven unde geschencket werden. Unde betalinge des vorgescreven brutschattes schall scheen in mathen hijr nabescreven: De vorgenompte frouwe Teda scal desulven orer dochter mijt tebberden unde klederen, so einer grefinnen temet unde to dregende gebort, uthgeferdigt juncheren Ericke vorgenompt antworen unde senden veirteyndage vore offte veirteyndage na Pinxsten erstkomende na orer beider beleve unde overeynkomende wente tor Kloppenborch, unde all dat der summen des brutschattes medeschicken unde betalen an barem gemunteden Rijnschen golde vijffdusent gulden unde vor dusent gulden klenode unde gulden unde sulvern smijde, so dat so gudt alse sessdusent gulden dar ter stede mijt der juncfrouwen over geantwordet unde betalet werden, unde went uppe de stede, alse nomptliken wente tor Kloppenborch in, scal de vorgenante frouwe Teda vor soden summen goldes unde klenode, alse vorgescr. is, eventur unde vaer stan, unde den vordan nicht se, sunder de genante juncher Erick dat golt unde smijde up sijn eventure vordan bringen. Alse denne noch dredusent gulden nastendich bliven, de sal unde wil de vilgenante frouwe Teda, ore sone unde erven, juncheren Ericke edder sijnen erven wan he nicht en were, bynnen dren jaren, alse nomptliken uppe sunte Michaelis dach erstkomende vort over twen jaren twe dusent unde over einem jare darna dat leste dusent gulden betalen, unde eme unde sijnen erven der betalinge mit oreme oldesten sone unde loffwerdigen borgen nochaftige vorsegelinge unde vorwaringe don, unde de uppe de vorgescr. tijt tor Kloppenborch mede over to antwordende. Unde wan de betalinge der lesten drierdusent gulden deger unde all geschen ijs, denne so sal juncher Erick, sine broder unde erven, der upgenanten frouwen Teden, oren sonen unde erven, oren besegelden breeff weder antworden unde on der gantzen summen nochaftige quitancien geven, se offte ore erven edder Freslant der sake halven forder nicht to belangende. Hijr entegen scal unde wil de eddell juncher Erick der walgebornen juncfrouwen Heben vor eyne rechte lijfftucht unde wederstadinge myt willen unde vulbort siner broder laten vorscriven unde antworden sijn slot Pijnnenberge myt allem vorvalle, renthe unde upkome, ledich unde los, so dat in siner unde siner broder graveschop to Holsten gelegen is, dat alle jar renthen scall dusent Postulatesgulden unde nicht myn, unde darto sijnen hoff unde tollen bynnen Hamborch, unde alse de tollen den van Hamboreh to itliken jaren noch nicht vorlopen vorpendet is, scall sick desulve juncher Erick flitigen darmede bekummeren, offt he de jare moge breken, den tollen bij de lijftucht unbeworen to bringende; wer dat entstunde so drade denne de jare vorlopen sijn, scall he densulven tollen sunder sument bij de lijftucht ledigen unde bringen, unde desser lijftucht myt sijnen broderen der vorgerorden juncfrouwen fullenkomen geloven, vorsegelinge unde vorwaringe don. So offt de genante juncher Erick er or dodeshalven erschene, dat Godt frisste na sijnen gnaden, dat de denne rauwelken sunder enginge in ore lijftucht moge treden unde ore leventlanck daranne besitten; de lijftuchtesbreve scal men ock tor Kloppenborch overantworden, unde desulve juncher Erick scal de van Hamborch darto willigen, dat se or under orem ingesegelen vorscreven unde vorsegeln schullen se in orer lijftucht truwelken to vorbiddende, beschuttende unde beschermende na all orem vormoge tegen alsweme; unde were sake, wan se de upgenante juncfrouwe in de lijftucht getreden wer, unde de greven van Schomburch unde erven juncheren Erickes dat slot Pijnnenberge, den hoff unde tollen myt oren tobehoringen wolden wederhebben, so hebben se de macht beholden, dat se se dar myt dritteyndusent guden fulwichtigen Rinschen gulden mogen uthkopen, so dat se myt oren frouweliken rechticheit, myt klederen, klenoden unde myt den dritteyndusent gulden moge don wes or belevet. Dat dat allent wo vorgescreven sus vorhandelt, gedegedinget unde gesloten is, dar sint an unde over wesen van wegen des upgenanten junchern Erickes de erwerdige in Gode her Hinrick bijschuppe to Minden, de geduchtigen knapen Johan Nagel tom Rennenberge, Olrick van Landesberge tom Bocklo, Ludeke van Halle tor Lauwenauwe, drosten, Hinrick van Wethberge, Hinrick Barckmeiger unde Dethardus Doringlo; van wegen der upgenanten frouwen Teda unde orer dochter de erbaren Berndt abbet to Mariendall to Northen, her Onno ritter to Ewessum, mester Hicke van Dornum licenciatus in legibus, juncher Poppe to Pewessum hovetlinck, Hero Maurizes to Dornum, Haye tor Papenborch, beider part gekorne fruntlike degedingeslude unde frunde. Unde des to merer bekantnisse sint desser nottulen twe van eynen lude, myt eyner hant gescreven unde uter anderen gesneden, der de upgenante juncher Erick de eynen unde frouwe Teda de anderen hebben, unde in ene tuchnisse der warheit unde desser nottulen in allen puncten full to donde unde folchachtich to synde, so hebbe wij Erick greve vorbenant vor uns unde unse erven unde wij frouwe Teda grevinne vor uns unde unse sone unde erven unse rechten ingesegel beneden uppe dat spacium dusser nottelen don drucken. Gegeven ime jare unde dage boven bescreven.
x
| Edities |
E. Friedländer, Ostfriesisches Urkundenbuch II (Emden 1881), nr. 959 |
