| Nummer:oub0969 | Datum:7. April 1476 | Overlevering:Editie | Vindplaats:Ostfriesisches Urkundenbuch, II, S. 72, nr. 969 |
Interimsquittung über eine Abschlagszahlung von 2500 Rhein. Gulden auf den Brautschatz der Heba.
Wij Hinrick van Wetberge, knape, unde Dethardus Dorringelo, secretarius des erwerdigen in Godt hern Hinrickes bysschuppes to Mynden, bekennen unde betugen openbare in unde vormyddelst desser scryfft vor alsweme, dat wij als rechte ware vulmechtige sendeboden des eddelen unde walgebornen juncheren Ericks, greven to Holsten unde Schomburch, hute dato dusser scryft van der eddellen unde walgebornen frouwen Teden, greffynnen to Oestvreslant, van wegene unde to behoff des vorgenompten juncheren Erickes hebben upgenomen unde in redem getalden baren Rinschen golde geboret unde entfangen derdehalff dusent guder Rinschen gulden in affslage sulker summen, als se deme upgenanten juncheren Ericke mit orer dochter schall to brutschatte geven, unde hebben orer gnade umme lyfvar darup eynen openen besegelden breff myt eyner qwitancien overgegeven, unde wy willen unde schullen by deme vorgenompten unseme gnedigen juncheren werven unde vorhandelen, dat up sodane concept, als desulve frouwe Teda sinen gnaden der derdehalffdusent gulden wegene geschicket heft in mathen unde formen, so dat ludet, oren gnaden wederumme bynnen achte dagen negest na Paschen erstkomende, doch vyff ofte ses dage lenger ungeferlyck, vorsegelt schall geschicket worden sunder argelyst; unde de vilgenante unse gnedige junchere will der vorgerorden derdehalffdusent gulden van stunt darna, als wy de entfangen hebben, syn eventur, wyn unde vorlues stan, unde will desgeliken de nastendigen summen des brutschattes samptliken unde besunderen up sine egene kost unde eventur van der vilgenanten frouwen halen laten, unde dat wy dyt alsus als vulmechtige sendeboden vorhandelt, geworven unde van us gesecht hebben, des in orkunde hebbe wy der vorgenanten frouwen Teden desse cedulen gegeven, de ick Hinrick van Wetberge myt mynem ingesegel vorsegelt, unde ick Dethardus Dorringelo myt myner egenen hant gescreven hebben. Gegeven ame hilgen Palmdage, anno Domini Mo CCCCo.LXXo sexto.
