| Nummer:oub0992 | Datum:11. Aug. 1477 | Overlevering:Editie | Vindplaats:Ostfriesisches Urkundenbuch, II, S. 87, nr. 992 |
Merkel Tetten überträgt für den Fall seines kinderlosen Todes die ihm von der Himka testamentarisch vermachten Grundstücke im Hager Kirchspiel an die Gebrüder Poppo, Dido und Edzard Manninga, Häuptlinge zu Bargerbuhr, Pewsum und Jennelt.
Witlick, kundich und openbar zy alle vromen luden, de desse breff zeen, horen offt lesen, dat ick Merkell Tetten bekenne in krafft dessen breves, dat de ersame frouwe Himken saliger dechtenisse by sunden lyve, ghande, stande, myt vorberadene mode und ock in erene lesten begheerde und wolde, dat de vifftehalve stighe demede landes und dre myt sess und twintich roden mores und werven, belegen in Hager kaspel, also se an my gheervet hefft, scholden komen na mynen dode, so veer also God my nene rechte kinderen gheve, an den erberen duchtighen juncheren Poppen, Dyden und Edzard Mannynghe, broders to Bergum, Peuwesum und Jenleth etc. hovetlinge, und ere rechte erffnamen, eghentliken to bruken. Dessen sulven eren willen sette ick Merkel vors. vort und averdrege und gheve jegenwordich in krafft dessen breves myt wolberadene mode sunder wedderropent den upghenanten erberen juncheren Poppen, Dyden und Edzard Mannynga etc. und eren rechten erffnamen de vorghenomeden vifftehalve styghe demede landes und dree myt sess und twyntich roden mores und de werven beleghen inn Hagher kerspell alzo vorschreven an my gheervet etc. eghentlick, ghelick eren rechten eghenen guderen to bruken myt eren willen na mynen dode, so veer also my God noch in natyden nene rechte kindere vorlene, de ick nalate. Dusse ergerorde gave wil ick vast unvorbrokelyke holden sunder jenigerleye argelist, hulperede, nyge vunde efft wedersprake mynen anderen erffghenamen. Hyr hebben tugheslude gewesen de ersamen Haytet to Husum, Tyarck Uldynghe, junge Tyarck Garelsen, Ulrick Harrynge und Harel Goden. To merer tughenisse hebbe ick ghebeden den erberen heren Berende, abbet to sunte Mariendael tho Norden, her Feijken medekerckheren und heren Hayen und Mannen Tyarken, kerckvogede darsulvest, umme ere ingesegele to hengen en dessen breff, also se guthliken gedhan hebben. Am yare unses Heren dusent veerhundert seven und seventich, des negesten mandages vor unser leven Vrouwen dach assumptionis.
