Häuptling Edo Wiemken von Jever macht den von ihm zwischen den Städten Lübeck und Hamburg einerseits und dem Häuptling lko Onken zu Knyphausen und den Kindern des verstorbenen Alko andererseits bis zum 1. Mai 1480 vermittelten Waffenstillstand bekannt.
Ik[*] Ede Wymyken, tho Jever etc. hovetlinck, enkenne apenbar in dessem breve vor alleszweme, dat ik dorch bede unde vorfordringhe willen der erlyken radesheren der stad Bremen unde deme gemenen besten to gude hebbe voert vorhandelt, begrepen unde vorabeijdet eyn guetlick unde fruntlick bestand, velicheyt unde vrede twischen den ersamen rederen der stede Lubiicke unde Hamborch uppe de eyne, unde Iko Onnyken to Krypensen, ock zelligen Alken naghelaten kinderen, hovetlinges, uppe de andern zyden. Welck bestand, velicheyt unde vrede schal anstande syn van stand na gifte desses breves durende upp meydach negestkomende. Desz so hebbe ik van des erbenompten Iken to Krypense unde zelligen Alcken nagelaten kyndern wegen unde de ore den vorgescreven rederen der stede Lubiicke unde Hamborch oren borgeren, underzaten unde alle de ghenne, de ze myt rechte vorbidden unde vordegedinghen moghen, geredet, laved unde gesecht, rede, lave unde guetsegge jegenwordich in und myt kraft desses breves vor desset bestand, velicheyt unde vrede wol to holdende tho water unde to lande sunder alle argelist, hulperede eder nye vunde. Dessen to merer irkantnisse unde in eyn tuch der waerheyt hebbe ik Ede, hovetlingk eergenant, myn rechte ingesegel wytlyken heten hanghen beneden ant spacium dessen breves. Gegeven na der gebord Christi veerteynhundert amme negen unde tsoventigesten jare, amme dage sanctorum Cosme et Damyani.
x
| Fonds |
Ostfriesisches Urkundenbuch, II |
| Fol.nr. |
S. 109 |
| Nr |
1021 |
| Olim |
Orig. im Archive zu Hamburg. — Gleichzeitige Abschrift im Archive zu Lübeck. |
| Jaar |
1479 |
| Datumcode |
CosDam |
x
| Edities |
E. Friedländer, Ostfriesisches Urkundenbuch II (Emden 1881), nr. 1021 |
