| Nummer:oub1031 | Datum:16. April 1480 | Overlevering:Editie | Vindplaats:Ostfriesisches Urkundenbuch, II, S. 116, nr. 1031 |
Häuptling Edo Wiemken von Jever bekundet einen von ihm auf ein Jahr vermittelten Frieden zwischen den Städten Lübeck und Hamburg einerseits und der Witwe des Lubbo Onken, Benlop, und den Kindern des verstorbenen Alko zu Inhausen andererseits.
Ick Ede Wymeken, tho Jever etc. hovetlinck, bekenne unde betuge openbar in desseme breve vor allesweme, dat ick umme bede willen des ersamen raides tho Bremen hebbe vorhandelt unde bedegedinget tuschen der erbaren Benlopp, zalligen Lubbe Onken nagelatenen wedewen, unde zalligen Alcken kynderen to Jenhusen hovetling, an de eyne, unde den ersamen reden der steden Lubeke unde Hamborch an de anderen syden, eyn velich, vast unde unvorbrecklick bestant na gifte desses breves an durende uppe meydach naestkomende aver eyn jar, so dat under der benompten tijd der vorgenanten steden borgere, inwonere unde undersaten vor der genanten Beenloppe, den vorgescreven kynderen unde eren tostenderen, mogen vryg unde velich unbeschediget wancken to water unde to lande sunder jenigerleie argelist, hulperede eder nyge geverde. Desses to merer irkantnisse der warheijt hebbe ick Ede Wymeken upgenant myn rechte ingesegel witliken heten hengen beneden ant spatium desses breves. Datum anno Domini millesimo quadringentesimo octuagesimo, des sondages na Tiburtii et Valeriani.
