| Nummer:oub1123 | Datum:21. Nov. 1483 | Overlevering:Editie | Vindplaats:Ostfriesisches Urkundenbuch, II, S. 199, nr. 1123 |
Der Pfarrer und die Kirchenältesten zu Emden bekunden, dass sie mit Einwilligung der Gräfin Theda und des Propstes von Emden ein der Cosmas- und Damianuskirche früher geschenktes, in der Nähe des Rathhauses belegenes Haus dem Emder Bürger Albert Tydeken verkauft und ihm dabei auferlegt haben, gewisse jährliche Abgaben zu leisten.
Wy heer Johan Ludeman, kerckher tho Emeden, (Karsten) Scisebuttell, Hermen Snider und Nanno Houkena, kercksworen unde borgers daersulvest, bekennen und tuegen openbaer in unde overmiddesth dussen openen besegelden brieve vor alsweme, dat wij mit fryen willen unde wolberaden mode, mit consent, wille und vulborth der edeln und wolgeboren frouwe, frouw Thede, grafinne in Oistfriessland, und des werdigen mannes, mester Hicken, in dem keiserrechte licentiat, pravest tho Emeden unde hovethlinge tho Dhornum, hebben vorkoft und vorkopen jegenwordich in kraft unde macht dusses brieves tho ewigen tyden tho einen steden vasten erfkope deme beschedenen manne Alberth Tydeken, borger in Emeden, und seinen rechten erven, ein huiss binnen Emeden, belegen tegen dat rathuiss over inth westen, dat zalige Arendt Kreyell und Lucke, sein echte huisfrouwe, in God vorstorven, vortydes voer oirer doeth umb zalicheit oirer beider zeelen hebben gegeven den hilligen mertelers Cosme et Damiano, patronen und hovetherren der kerspelkarcken tho Emeden, dar Gerth van Gelren darsulvest borgemester ein huiss by hevet, staende inth zueden, und Johann van Wynsen, ock in Godt vorstorven, ofte seine rechte erfgenhame ein huiss hebben by stande int norden, voer einen summen geldes, de uns, herr Johann kerckheer unde kercksworen vorscr., deger, woll unde all betaelt in van Alberde voirbenompt, de erste penninck mit dem lesten tho unser vuller genoege, datt wy em dancken, mit aldusdane beschede unde vordrach, dath Alberth vorgemelth unde seine rechten erve ofte holder dusses brieves, mit rechte scholen und willen jarlikes tho ewigen tyden uth deme vorscr. huse geven unde betalen den negen presters, de nhu tho desser tydt in der vorscr. kercken sinth und oiren rechten nhakomelingen in und up oeren lenen, prebenden ofte altaren, ithlich einen golden Rinsgulden, gemuntet vor datum dusses brieves, umbekummerth, alle jahr up sunte Michaelis archangeli dach, umb zalicheit Arenth und Lucke vorscr. beider zeelen, und einen golden Rinsgulden den kercksworen voer den werf, daer dat huiss up steith. Ock so scholen unde willen wy vorgeroerde vorkopers Alberde vorscr. unde seinen rechten erven dath huiss fry und qwyth warende wesen vor alle ansprake beide gestliches und welthliches rechtes tho ewigen dagen, alle nye vunde unde hulperede, de dussen koep tiegen mochte wesen, uthgesecht. Hir mede, by, ahn und over wehren als tuegesluede dartho geropen de ersame heer Eno, cappellaen up der borch Emeden, und de beschedene manns Berent van Duten, ock borgemester der stadt Emeden, und olde Roleff Schroder, borger darsulvest. Tho einer merer getuichnisse der waerheit hebben wy kercksworen vorscr. frunthliken gebeden den duchtigen mester Hicken und heren Johan vorbenompt, dussen breff vor uns tho besegelen; und wy mester Hicko und her Johan vorscr. umb frunthliker bede willen der kercksworen vorgemelth, hebben dohn hangen unser beider zegell beneden an dath spatium dusses brieves. De gegeven unde dath gescreven in nha der borth Christi vertheinhunderth jahr, darnha in deme dre unde achtichsten jahre, des vridages nha sante Elisabeth dage.
Auschultereth und conferereth jegen seine principaele vorsegelde brieff is bevunden van worht tho worden darmede overein tho stemmen; dath mith undergeschr. handt orkunde ick Hinr. Gerdes, secretarius reipublicae Emdensis.
Auschultereth und conferereth jegen seine principaele vorsegelde brieff is bevunden van worht tho worden darmede overein tho stemmen; dath mith undergeschr. handt orkunde ick Hinr. Gerdes, secretarius reipublicae Emdensis.
