| Nummer:oub1178 | Datum:8. Jan. 1487 | Overlevering:Editie | Vindplaats:Ostfriesisches Urkundenbuch, II, S. 248, nr. 1178 |
Markel Engenna verpachtet dem Kloster Koldinne ein Grundstück (?) für eine Summe Geldes, die nur dann erhöht werden darf, wenn auch andere Grundstücke höher verpachtet werden.
Wytlick, kundich und apenbaer sy allen vromen luden, de desse certeren seen, horen offte lesen, dat ick Markel Engenna myt vulboert Wille Tyrlinges unde Manno Erkenna hebbe verhuert van der bure wegene Laydimer veer[*] myt deme lande, dat dar Itze blach to brukene, deme innyghen oethmodigen unde gheestliken heren Hinrick, pater des conventes unde kloesters tor Koldynnen, unde scholen dat land bruken to ereme willen, dewile dat de pater offte dat convente de hure jaerlinx betalet sunder jemants wedderseggent. Meer weert dat ander tele, de in der jeghennade[*] beleghen synnen, worden vorhoghet myt der hure, so schal deme pater offte convente ock de hure vorhoghet weerden na vorlope des landes. Unde desser certeren scolen wesen twee, de ene uth der anderen sneden a. b. c. d. Hijr hebben by, an unde over ghewesen tuchslude gheschet de ersame her Hayo, vicarius tho Norden, unde Sander barthscherer. In deme jare unses Heren dusent veerhundert unde seven unde tachtentich, des maendages na der hilligen dree konyngen.[*]
