| Nummer:oub1428 | Datum:20. Febr. 1495 | Overlevering:Editie | Vindplaats:Ostfriesisches Urkundenbuch, II, S. 441, nr. 1428 |
Häuptling lko Onken zu Knyphausen urkundet über seine Entlassung aus seiner in der wegen seines Vetters Folf ausgebrochenen Fehde mit dem Häuptling Edo Wiemken zu Jever durch den Ritter Hero van Dornum bewirkten Gefangenschaft, und die wegen der Burg Knyphausen getroffene Vereinbarung.
Ick Iko Onneken, tho Knypensen hovetlingk, enkenne unde tuge in unde avermyds dussen apenen beseghelden briefe vor alsweme, so ick durgh vorhalinghe wegen Foelfes myns veddern heeroersakende myt deme erbaren unde duchtigen mynen gnedigen leven junckheren, junckheren Eden, tho Jhever, Oestringen, Rustringen unde Wangerlandt hovetlinge, was tho twyste unde unwillen gekomen unde dairover de ghestrenge unde erbare myn gnedige leve heer, Hero van Dornum, Esense, Stedestorp unde Witmunde ritther, syner gnaden leve swager, my gethonet unde vencklick genomen, heb ich denne myt eren gnaden, se my sodaner thosage unde vorhalinge halven wedder tho gnaden nemende, derhalven gelofflyken unde liefflyken in dusser nabescreven weise frundtlyken vorenygedt unde vorlyket, so dat ick Iko vorg. myt ripem rade, wall vorbedachten nuchternen mode, mynem gnedigen leven junckheren ergenant, de borgh Knypensen in syner gnaden hande hebbe gheschulden myt my dairuppe tho theende, so starck so idt synen gnaden synlick is, unde ick so starck so my syne gnaden dairuppe tho theende willen vorstaden, unde denne de borgh myt eynem damme na syner gnaden willen tho krenckende, nicht wedder tho bevestende, idt en sy den myt syner gnaden edder synen arven weten unde willen, unde denne viff edder sess dage myt my dairupp tho blivende, denn syne gnaden myt den synen wedder aff theende, my by den mynen idt sy denn ghelt, galt edder sulver, arve edder guedt, borge edder heerlicheyde, so ick unde myn vader milder dechtnisse dairmede bearvet syndt, by blyven tho latende de tytlanck myns levendes; unde wen ick na den willen Godts dodeshalven vorvalle, sall sodanne borgh Knypensen myt alle erer thobehoringen my belangende an anders nummande sunder an mynen gnedigen leven junckheren unde syner gnaden arven, so ich nyn echte rechte unde eelyke kyndere nalate, wesen vorvallen, unde scolen syner gnaden meyere, ock Rickloffs unde Memmen tho Roeffhusen gebrodere eer meyere im karspell tho Ackum wonhafftich, hoffdenstes, tynses unde tegeden, se tho Knypensen plegen tho donde, unbekummert leddich unde loes syn, unde wil synen gnaden, synen arven unde undersaten, de tytlangk myns levendes truwe unde holdt blyven unde wesen, in allen dingen eer beste tho wetende unde eer argeste na mynem vormoge tho kerende, nummande uppe Knypensen tho vorstadende, dat mynem gnedigen leven junckheren, synen arven unde thogewanten wairanne mochte hinderlich, schedelich edder entygen syn. Ock furdermeer so en will noch gedencke ick Iko vorg. jummande uth tho verdigende, jenygen anfangk noch tho water edder tho lande doen tho latende, idt en sy myt myns gnedigen leven junckheren vullborde, weten unde willen, unde so ick van deme ghestrengen myneme gnedigen leven heren Hero van Dornum ritther etc. vorben. vorhalinge halven tegen mym gnedigen leven junckheren so bovengenant, was getonet unde vengklick genomen, ghedencke ick Iko vorg. unde myne arven edder nummande van unser wegen uppe mynem gnedigen leven heren ergenant, ock mynem gnedigen leven junckheren vorg. unde eren arven, sodaner toeffnisse halven unde scaden in allen thokomenden tyden nicht tho sakende, tho vedende edder tho hatende, sunder jenygerleye argelist. Ock my Iken vorg. mede behalden, dat de knechte, de nuw upp Knypensen syndt, de mynen gnedigen heren, ock mynen gnedigen junckheren myt nynen dingen voelbracht en hebben, myt my in myner kost tho blyvende, eer gnaden sick dairann nicht tho streckende, so se nyne thosage upp sie en hebben; weren dair ock averst ichteswelcke knechte dairmede, de eren gnaden entyegen gedaen hadden, scolen desulfften myt erem tuge vryg unde velich affgaen, unbehindert lyffs unde guedts. Alle dusse stucke, puncte unde articule sampt unde besonderen heb ick Iko vorg. vor my ende mynen arven dem vilgedachten mynem gnedigen junekheren unde synen arven ghelovet unde ghesworen, love unde zwere de jegenwordich myt dusser scrifft myt uthgestreckeden armen, upgerichteden lyfflyken vingeren, stavedes edes in den hilligen zwerende, stede, vast unde unvorbroken in gueden truwen woll tho holdende sunder jenygerleye argelist; wurden ock averst van my edder den mynen jenich van dessen bovengescr. stocken gekrenket unde ingebroken myt hande edder myt munde, heb ich derhalven annamet unde bewillet, bewille unde anname jegenwordich in krafft dusses brieffs by densulfften lofften unde eden so bovengescr., wedder in myns gnedigen leven junckheren hechte to gaende, dair nicht uth tho schedende, ick en sy denn myt holte unde iseren dairann vorwaert unde na syner gnaden willen woll besorgedt. Dusses tho merer tuchnisse der wairheydt syndt dusser soenbreve twe, allyke eyns ludende unde myt eyner hant gescreven, de eyne von deme erbairen unde duchtigen mynem gnedigen leven junckheren, junckheren Eden, tho Jhever etc. hovetling, bovengescr. vorseghelt unde by my Iken upgenant vorwacht, unde de ander, van my sulvest myn rechte ingesegel witlicken benedden hyrann hangende vorsegheldt, by mynem gnedigen leven junckheren in vorwaringe iss enthalden. De screven unde ghegeven syndt na der ghebuerdt Christi unses Heren viertheynhundert, dairna imm vif undetnegentighesten jaire, amm fridage vor sunte Petersdage ad cathedram.
