Der Pfarrer und bischöfliche Officialatskommissar zu Emden Hermann Wessel bekundet den Verkauf mehrerer Grundstücke seitens des Habbo Wiltetsna zu Eilsum an Bolardus von Jemgum und dessen Frau.

Ick mester Harmen Wessell, kercher to Emeden unde van bevele des werdigen officials van Vreislande commissar darsulffs, bekenne unde betuge apembar vermits dussem mynem apenen besegelden breve vor alsweme, wo vor my is gekomen de beschedene Habbo Wiltetsna, buerman to Edelsum, unde bekande in bywesent unde mit medebelevent des ersamen heren Haytedes, prebendaten darsulffs, dat he mit vrien willen unde wolberadens modes hedde vercofft unde noch jegenwordich in krafft s breffs vercoffte erfflick unde ewelick vor sick unde sine erven offte anerven deme ersamen Bolardo van Jemgum, borger in Emedenn, Elzeken siner eliger huesfrouwen unde orer twijer erven derteyndehalff grass[*] etlandes in Pewesummer hamrick in eyner fenne, liggende by Eyschehorn, dar de kercher darsulffs by belandet is, noch dree grase etlandes in Waechwerder hamrick, noch een half grass tyllandes in Wachwerder hamrick, noch twe tweede grase by Visquarter path, noch een gras in Boerchmanne tyoche unde een grass inna Boegem, vor eyne tsumme van gelde, welcke de ergenante Habbo bekande, ome de erste penninck mit deme latesten to willen unde vuller genoge van deme ergemelten Bolardo woll entrichtet unde betalet were, des he ome bedanckte, unde lavede ome unde sinen erven vor sick unde einen erffgenamen dusses vurscr. landes gude warscuppe to done vor alle ansprake geistlikes effte wartlikes gerichtes, wanner ende wo vaken on sulcks van noden to done mochte werden sunder argelist. Item noch behende Habbo vurser., dat he Bolardo vurscr. hedde vercofft in aler mathe wo vurscr., ome oick woll betalt, een half grass in Myddelste tyoche. Tugeslude stet genest hyrto geropen de ersame Clawes Goltscmit, schipper Ewe, Thije Menen, borgers in Emeden, [*] unde Ocko Folckertsna to Suderhusen. To merer orkunde der warheit, so heb ick mester Hermen, kercher ergenant, myn ingesegel durch Habben vurscr. bede willen an dussen breff gehangen. Datum anno Domini M^o CCCC^o XCVI^o, in vigilia omnium sanctorum.

x

x

Fonds	Ostfriesisches Urkundenbuch, II
Fol.nr.	S. 515
Nr	1508
Olim	Orig. Perg. im Archive der Gesellschaft für bild. Kunst etc. zu Emden.
Jaar	1496
Datumcode	vOmnSan

x

x

Commentaar	Das Siegel ist erhalten, es enthält ein monogrammatisch verschlungenes HW mit der Umschrift S. Hermanni Wessel.

x

Materiaal	papier

x

Edities	E. Friedländer, Ostfriesisches Urkundenbuch II (Emden 1881), nr. 1508