| Nummer:oub1585 | Datum:9. Febr. 1498 | Overlevering:Editie | Vindplaats:Ostfriesisches Urkundenbuch, II, S. 576, nr. 1585 |
Der Präbendat der Kirche zu Suurhusen, Tyarck, tauscht mit dem Pfarrer von Larrelt näher bezeichnete Grundstücke aus.
Ick her Tyarck, prebendaet der kerken to Suderhusum, bekenne unde betughe apenbaer vormyds dussem apenen beseghelden breve vor alsweme, dat yck persoenlyken unde witlyken myt beraden mode hebbe anghegaen unde angae jeghenwordich yn kraft s breves eyn ewyghe weslynghe myt mester Dyver, kerchere to Lerlt, in dusser wyse, also dat yck her Tyarck voerghenomet tosta ewych unde erflyck deme vorbenomeden mester Dywer ses grase landes, beleghen inne Comper hammerick, gheheten inne Abbynghewolde, daer yck her Tyarck vorscr. vor untfanghen hebbe van deme vorbenomeden mester Dywer veer demede etlandes, beleghen inne Suderhusummer hammerick, by den Osterenwech, daer vrowe Reynst by landet ys upt suden myt achte demeden unde salyghen Haden kynder by landet synt upt noerden myt dardehalff demet sunder alle arghelist. Tugheslude hyrtho gheescket unde ghebeden synt ghewest de erbaren mans Ulbeth Boyngsna unde Oesbrant, buerlude to Suderhusum. Tho merer oerkunde der waerheyt unde tuechnysse hebbe yck her Tyarck ergenant ghebeden den ersamen unde vorsichtighen manne mester Auteth, kerchere to Suderhusum, he myt syn ingheseghel dessen breeff voer my wolde beseghelen, deme yck miester Anteils voerghenomed umme her Tyarckes vorbenomed vruntlyker bede willen so hebbe ghedaen, unde hebbe myn rechte ingheseghel wytlyken benedden an dessen breeff ghehanghen, de ghescreven ys ame daghe Appolonie der hilghen juncfrowen, na der boert Christi veerteynhundert, daerna inne deme achte ende neghentichsten yare.
