Die Aebte, Prälaten, Häuptlinge und Landsassen zwischen der Ems und Lauwers, mit Ausnahme des Oldamtes, bekunden, von den Grafen Edzard und Uko von Ostfriesland 4500 Rheinische Goldgulden geliehen zu haben und versprechen pünktliche Zurückzahlung zu Pfingsten unter Verpflichtung zum Einlager in Emden.
Wy abten unde prelaten, ouck gemeyne hovetlinge unde landtsaten tuschen der Emess unde Lauwers beseten, sampt unde besonder, nemandts uitgescheiden behalven dat Oldeampt, doen kundt unde bekennen mit dessen unsen openen besegelden breve voir alsweme, dat wy den edln unde wolgebornen heren Edeszarde unde Uken, gebrodern, graven unde heren to Oestfrieslant etc., rechter redelycher schult plichtig unde schuldig syn vifftehalffduesent golden gueden Rynsche gulden, de uns deselven graven unde heren mit besondern gunst, flijt unde guetwillicheit in baren reden golde to unser mercklicher noitdruft unde anfallenden saken guetlichen gelient unde gehantreket hebben, in solicher mathen, dat wy sollen unde willen deselven vifftehallffdusent golden gulden oren gnaden upp dessen negesten anstaenden hilligen Pinxttag[*] sonder jenig vurtoch, indracht, vuraidt, moye ader schaden in oren gnaden handen unde seker gewallt bynnen der stadt Emeden getrouwelijchen vurnogen, betalen unde weder overantworden; unde ofte wy in sodaner betalinge unde wederleveronge derselven vifftehalffdusent golden in mathen unde upp tidt egedacht vursumich worden unde de allso nicht en deden, szo beleven, vurplichten unde vurwilligen wy sampt unde jeder besonder, dat de gemelten graven unde heren to Oestfrieslant etc. unss abten unde hovetlinge nageschreven edder etlichen andere von unss allen, wo veel oren gnaden belevet, mogen vorderen unde eschen, de alsdan van stondt na sodanner vorderinge unde eschonge sunder jenige vurstreckonge ader vurbeiden by oren eren, geloven unde gueden trouwen scholen unde willen kamen unde inholden bynnen der stadt Emeden egedacht, unde nicht van dair scheiden, den egemelten graven unde heren syn dan sodanne vifftehalfdusent Rinsche gulden in gueden, baren, reden gelde mit upgegangen schaden unde unkosten orentwegen gedaen deger unde all to oren gnaden guetgefallen unde benoghe de erste pennynck mit deme latesten in eyner alingher szommen vurnoget unde betailt, ane jenig argelist, hulperede, nye vunde ader geverde; vurlaten unde vurteyn ouck mit desen unsen breve szampt unde besonder aller exceptien unde behulpe, beide geistlichen unde werheltlichen rechtes unde privilegien etc., dairmede wy sampt ader unser eyn uns tegen desen voirgerorten vurplichtonge unde belevinge in jeniger wise mochten oder konden beschudden, beschermen ofte entegen kamen. Des to urkunde der wairheit hebben wy Wolterus tho Adewerdt, Johannes to Rotthum, Gerhardus to Selwerdt unde Johannes ton olden cloister, abbaten, unde wy Rolleff von Euweshum, Hayo Repperda provest, Asige to Rasckqwardt, Abeko Tammynge unde Eggerdt Repperda unse rechte ingeszegelle unde des landes szegell voir uns unde von wegen der anderen prelaten unde hovetlinge durch ore bede witlichen an desen brieff doen hangen. Gegeven unde vursegelt ime jair unses Heren duesent vierhundert acht undetnegentich, up den dag crucis inventionis.
x
| Fonds |
Ostfriesisches Urkundenbuch, II |
| Fol.nr. |
S. 582 |
| Nr |
1595 |
| Olim |
Orig. Perg. Grosse Urkundensammlung, Nr. 184. Abschrift im Archive zu Groningen. |
| Jaar |
1498 |
| Datumcode |
InvCru |
x
| Edities |
E. Friedländer, Ostfriesisches Urkundenbuch II (Emden 1881), nr. 1595 |
