| Nummer:oub1710 | Datum:11. Sept. 1398 | Overlevering:Editie | Vindplaats:Ostfriesisches Urkundenbuch, II, S. 668, nr. 1710 |
Dieselben und einige Häuptlinge zwischen Ems und Lauwers, denen der Herzog von Baiern Zollfreiheit in seinen Landen gewährt hat, bekunden, dass auch sie dem Herzog und seinen Unterthanen Zollfreiheit in ihrem Gebiete einräumen.
Wij Widzel, heeren Ocken zoen, Volmaer Allen zoen, hoiftlude tusschen der Eemse ende der Jade, ende Aytets Ferhildema ende Reyner Eysingha, hoiftlinghe tusschen der Lauwerze ende der Eemse in Oestvrieslant, doen cond allen luden, want onse lyeve ende ghenedighe heer, her- tage Ailbrecht van Beyeren, grave van Henegouwen, van Hollant, van Zeelant ende heere van Vrieslant van synre ghenaden ons ende onsen nacomelinghen alsulke gratie ghedaen heeft mit sinen openen brieven, alse dat wy ende alle onse lude ende ondersaten gheseten in sulken landen, als wy denselven onsen lyeven heer opgedraghen hebben, tot ewighen daghen tollenvry varen sullen mit onsen scepen ende goeden voerby alle syn tollen in sinen landen voirscr.; soe hebben wij weder gheloeft ende gheloven mit desen brieve voer ons ende onsen nacomelinghen onsen lyeven heere, hertoge Ailbrecht voirsrc. ende synen nacomelinghen, dat alle syn lude ende ondersate in sinen landen voirscr. gheseten tot ewighen daghen desgheliken tollenvrij varen ende keren sullen mit horen scepen ende goeden in allen onsen landen ende bedriven, die wy nu ter tijt hebben of namels vercrighen sullen ende wy onsen lyeven here voirs. opghedraghen hebben. In kennissen der waerheit hebben wy onsen seghel hieraen ghehanghen. Gegheven upten elften dach in Septembri, anno XCVIIIo.
