| Nummer:oub1715 | Datum:Vor dem 2. Mai 1399 | Overlevering:Editie | Vindplaats:Ostfriesisches Urkundenbuch, II, S. 671, nr. 1715 |
Lübeck an Widzel tom Brok: wegen Verlegung der zum 1. Mai anberaumten Tagfahrt auf den 25. Juli, und Widzels Unterwerfung unter den Schiedsspruch Herzog Alberts von Holland.
Wiidczold. Wy hebben juwen briff wol vornomen, als dat ghii dy lude bet up sente Johannis dach negestkomende ynne beholden willen. Und als wy juo letest screven, dat dy stede hiir tosamende komen worden up sente Walpurgis dage, des wetet, dat den steden grot notsake benympt, so dat sy den dach nicht holden mochten; men dy dach, umme vele anders anvallis willen vordan bet up sendte Jacobs dach negestkomende vorlengit in, und denne werden dy stede meynliken hie tosamende komen, met den wille wy dat gerne handelen, alse wye vruntlikest konnen, des ghi begherende sint. Als ghii ok scriven, dat ghii der sake blyven willet by dem irluchtesten vuersten herthegen Albrecht, greven to Holland, des wetet, dat uns dy bere herthege datsuelve desgeliix geschreven hofft, dem wy wedder screven hebben, dat wy dat mit den steten up sendte Jacobs dach vorscreven gerne handelen willen, und wy vormoden uns wol, dat dy stede des nicht vorlenghin werden. Hirumme bidde wy, dat ghii darvor wezen willen, dat dy lude in der zee nenen scaden vorder dem copmanne en doen, wente dem heren herthogen und juo dy stede een antworde weddir scriven schullen von demsulven daghe.
Consules civitatis Lubicensis.
Consules civitatis Lubicensis.
