| Nummer:oub1730 | Datum:Emden, 23. Mai 1400 | Overlevering:Editie | Vindplaats:Ostfriesisches Urkundenbuch, II, S. 689, nr. 1730 |
Keno tom Brok und Folkmar Allena, Häuptling zu Osterhusen, auf der einen Seite, und Leward von Emden, Häuptling zu Norden, Edo Wiemken, Häuptling zu Rustringen, und Hisko, Propst und Häuptling zu Emden, auf der andern, urkunden über eine von ihnen unter Vermittelung der Hauptleute der Städte geschlossene Sühne.
Wy Kene, her Okken sone van den Broke, unde Volkmar Allen, hovetlynch to Osterhusen, bekennen in dessen apen breve vor uns unde vor unse partie vrund, gheboren unde unghebaren, unde alle, de umme unsen wyllen dun unde laten wyllen, wy Leward van Emede, hovetlynch to Norden, Ede Wymmekens, hovetlynch in Rustrynghes verdel, Hysseke, hovetlynch unde provest to Emede, vor uns unde vor unse partie vrunt, boren unde ungheboren, unde alle de dorch unsen wyllen dun unde laten wyllen, wy bekennen unde betuoghen in dessen breve, dat de hovetlude van den steden vorgescreven uns vorsonet unde voreneghet hebbet ganselykn, dat wy van beyden partien vorgescreven de sone vuolkamen holden wylien unde schullen, sunder jenigherleye arghelyst. Were ok, dat jemand, ut welker partie he were, desse sone nycht holden enne wolden, wen dat to weten wurde van us veren, de de beyde partie to oren scheydesluden ghekoren hebben, de scholen em dat toentbeden, dat he de sone holden schal; dede he des nycht bynnen vyrteyn nachten, so wylle wy beyde partie unde schullen ene mid macht darto bringhen unde ene gansliken vorderven. Vortmer so love wy van beyden partien weghen, dat unser neyn den andren beschedyghen schal. Were aver, dat id jeman dede, dar desse sone an vorbroken worde, de scholde id kundyghen den vorgescreven ver schedesluden, dat se degene to antwerde laden; kunde ren en des nycht mid rechte overghan, dat de sone aldus vorbroken were, so schullen de sonebrakers wedderdon bynnen vyrteyn nachten lyk vor unlyk; schude des nycht, so schulle wy beyde partie ene vorderven an lyve unde an gude, also vorgescreven steyd. Vortmer so schal eyn jewelych blyven by synen vryen Vreschen rechte, unde were, dat id jemand breke, de schal dat beteren, also hyr vorgescreven steyt. Wortmer schulle wy unde wyllen van unser beyder partie weghen alle schelinghe, de unser eyn to den andren heft, id sy, wad id sy, dat schal stan in ener guoden vasten sone uppe recht, alzo dat islyk partie schal kesen twe bedderve man, de syk uppe Vrese recht vorstan, de vere schullen dat sweren in den hyllyghen, dat se enen jeweliken scheyden wyllen na Vreeschen rechte unde horen malkes klaghe unde antwerde; dat schullen se scheyden twyschen hyr unde suntte Jacobes daghe, de nue neges tokomende is; (25. Juli) kunnen se des nycht duon, so schullen se to Groninghen komen unde underseen, wat dat en embreket, also dat se den steden moghen entbeden, dat de stede dartho senden moghen; unde wene dat de stede dartho senden, de kose wy tho averluden, dat se de schelinghe moghen scheyden eer wynachten, de syk Vresches rechtes bevraghen moghen; unde wat de averlude den vorhenghen, dar schal id by blyven. Were, dat dar jemand wedder dede, dar schullen beyde partie up vallen, unde vorderven se an lyve unde an gude. Wortmer schal eyn jewelych, he sy Vrese edder Dudesche, vry varen to lande unde to watere, by nachte edder by daghe, sunder jennegherleye beschattynghe; were dat id jemand breke, dar schal wen aver rychten, also hir vorgescreven steyt. Alle desse vorgescreven stucke unde artikle unde eyn islycht bysunderen love wy alle, de hyr nagescreven stad, in guoden truwen, stede unde vaste, unghebroken to holdene, sunder jenegher hulperede unde arghelyst utghenomen, unde hebben des unse inghesegele wytlyken ghehanghen laten an dessen bref: wy Kene, her Okken sone van den Broke, Leward van Emeden, hovetlynch to Norden, Volkmar Alle, hovetlynch to Osterhusen, Ede Wymmekens, hovetlynch in Rustrynghes verdeel, Haro Haldsna, hovetlynch to Valren, Hysseke, hovedlynch unde pravest to Emeden, Henno Aydedyssone to Herllete, Haro Yserdyssone, hovetlynch in der Grede, Affa Benyngha, hovetlynch to Pylsym, Luobbe Tzybyetyssone, junghe Hero, hovetlynch to Dornym, Norke Dueressone, olde Hero, hovetlynch to Dornym, Tzase Daeressone, junghe Folkolf to Schortinse, Folkerd Jagenssone, Isbrand Rodolvissone, hovetlynch to Repesholte, Gherke Undykenssone, Dydo Luobbensone, hovetlynch to Rodenkerken, Konkka Hynkana, Hynkana syn sone, Hayo Ylyessone, hovetlynch to Vaerle, Eggo Herynghes, Peko Ekkerdes sone, Tenko van Langworde, ok alle Muomuorland myd oreen seghele, Lantsyngerland myd orem seghele, Overladyngherland mit oren twen seghelen, Sagherderland mid oren seghele unde Asstryngherland myd oren seghele. Were id, dat eyn edder twe edder mer, de hyr vorgescreven stad, nycht besegelden, dar scholde desse vorgescreven bref nycht mede vorbraken wesen, de screven unde geven is to Emede, na Gades bord verteynhunderd jar, des sondaghes vor suntte Urbanes daghe.
