| Nummer:oub1775 | Datum:1. Juli 1434 | Overlevering:Editie | Vindplaats:Ostfriesisches Urkundenbuch, II, S. 736, nr. 1775 |
Ocka tom Brok und Hima Idzinga bekunden, dass Ocko's Mutter Adda die ursprünglich an Vrouwe Idzinga bei ihrer Vermählung mit Poppo Manninga gegebene und von dieser weiter vererbte Ausstattung erhalten hat.
Witlick und kundich zy allen guden luden, de dessen breff zeen of horen lesen, dat wy juncher Ocko und vrou Hymbe[*] Itzinga sint des bekant vor allesweme, dat vrou Adde, juncheren Ocken moder, hefft entfangen den boldbrenger, [*] de daer was gegeven Vrouwen Itzinga, zaligen Frederikes moder, do see zaligen Poppen Manninga waert tho echte gegeven, welcker boldenbrenger de daer waer wedder gearvet vrouw Adden, vorbenoemden juncheren Ocken moder, als dat vrow Adde den vorbeschrevene boldebrenger hefft wedder untfangen mit consent unnd volbort vrou Hymben Itzinga, als dat wy Ocko, Adde[*] und Hymbe Itzinga voerbedacht willen vry und quyt holden Luthet Mannynga, syne erven und vrunden, boren und ungeborenn, van alle ansprake unser vrunden, de syck stricken willen ofte mogen an den vorschreven boldebrenger, sunder alle argelist und nye intoge. In oerkunde desser warheyt so hebben wy juncker Ocko und vrou Hymbe unse beyde ingesegele gehangen witliken an dat spacium desses breves, de gegeven und geschreven is na Godes boert duysent veerhundert veer und dertich, octava sancti Johannis baptiste.
