Roedolph van Diepholt, bisschop te Utrecht, ontslaat Betyngeguet in het kerspel van Rolde in de buurschap van Loon, behorende tot zijn tafelgoederen, dat na het overlijden zonder erfgenamen van Boeliken Betynge aan hem was teruggekomen, uit de horigheid en geeft het in pacht aan de abdij te Assen, tegen een rente van 3 mudden rogge te leveren "opten spiker tot Anloe". Met toestemming en medebezegeling door de vijf kapittels.

Wy Roedolph van Diepholt byder genaden Goits bisscop tot Utrecht maken kont allen luden dat ons vervallen ende toe hoere gecomen is een erve ende
guet geheyten Betynge guet myt synen toebehoeren gelegen in onsen lande van Drenthe inden kerspel van Rolde inder buerscap van Loen vermits
dode Boeliken Betynge die onse ende onss Gestichts hoerige man was ende ghene sulke erfgenaem affter hem en heeft gelaten dair dat aencoemen ende
op erven mochte nae gehoricheit ende naetuer des selven erves ende guedes soe hebben wy dat genoemen aen ons, gevrijet ende ontbonden van
der horicheit voirscreven. Ende want wy dan altoes geney-get syn onse ende onses gestichtes renthen ende tafelguede te groten ende te vermeeren,
soe hebben wy dat selve erve ende guet myt synen toebehoe-ren dair wy ende onse gestichte achtyn vleemschen siaers ende nyet meer aff en plegen
te hebben, vercofft ende uutgedaen, vercopen ende uutdoen myt desen onsen brieve voir ons ende onsen naecoemelyngen bisscopen tot Utrecht
erfflike ende ewelike onsen cloester tot Assen sant Ber-nardus oerden omme drie mudde roggen Groninger maten uut den selven erven ende
guede jaerlix te betalen ende te leveren tot onser ende onss gestichts behoef opten Spiker tot Anloe aen handen onss amptmans ende rent-
meisters inder tyt onss lands van Drenthe. Ende daer toe omme een summe van gelde die ons wittelike ende wel is betaelt. Ende die
wy voirt gekiert ende geleecht hebben in vermeeryngen orber ende nutticheit onss ende onss gestichts renthen. Alle argelist hier ynne uut
geseecht. In oirkunde sbriefs besegelt myt onsen segele ende want wy prelaten, dekenen ende capittelen vanden Doeme, van Oudemun-
ster, van Sant Peter, van Sant Johan ende van Sante Marien kercken tot Utrecht bekennen alle dese punten voirscreven ende ellic bysonder
geschiet te weesen by onsen guetduncken, raede, consente ende volbaert voer orbaer ende nutticheit als voirscreven is, soe hebben wy onser
kercken segelen myt segele onss genedichs heeren van Utrecht voirscreven aen desen brief doen hangen tot meere vestenysse. Ende omme
alle punten voirscreven stede ende vaste te weesen tot ewigen dagen. Gegeven int jair onss heeren dusent vierhondert vierendeveertich des
tweendetwyntichsten dages inder maent van april.

x

x

Archief	Drents Archief
Fonds	Arch. Abdij Assen
Inventarisnr.	89
Regestnr.	52
Jaar	1444
Datumcode	2204

x

x

Commentaar	Met geschonden zegels van den bisschop en het kapittel van St. Jan in roode was, de zegels der overige 4 kapittelen zijn verloren.

x

Materiaal	perkament
Afmeting (mm)	370/160

x