Alberd Schomaker geeft voor buren van Zeyyen aan het klooster van Assen "voir een testament" een rente van 1 stede Groninger mud rogge, door hem gekocht van wijlen Daem Westebringe uit diens goed Westebringe in de buurschap en de marke van Zeyen in de parochie Vries, nu in gebruik bij Ludekin die Beylssche en Hannekin, weduwe van Johan. Met bezegeling door Alberds zoon Johan, priester.

Ic Alberd Schomaker bekenne ende tuge myt dessen openen besegelden breve voir my ende voir myne rechte erffgenamen dat ick myt ghezunden
live ende myt enen vryen wille ghegeven hebbe ende gheve den cloester van Assen om salicheit mynre zielen voir een testament een
stede mudde roggen jairlix Groninger maete als ick Alberd voirscreven in voertyden ghekofft hebbe van Daem Westebringe saliger gedachte
over alle syn gued ende erve gheheten Westebringe woe ende oeck waer dat tghelegen is in der buersscapp ende marke van Zeyyen
in den kerspel van Vrees, welk erve ende gued voirscreven nu opp datum desses breves Ludekin die Beylssche ende Hannekin salige Johans
huesvrouwe synt brukende ende is dat oldeste mudde dat over dat voirscreven gued verkofft is dair ick Alberd voirscreven die brukene
ende dat besit van hebbe ghehat als een landrecht uutwijst. Alsoe dat ick hijr van rechte vertichnisse ghedaen hebbe voir my ende
voir myne erffgenamen toe behoeff dess cloesters van Assen voirscreven ende hebbe broeder Henricke Schadinge hoffmeister inder tijd
van dess cloesters wegen hijr van den stock gheleget als een landrecht is in Drenthe voir den bueren van Zeyyen hijr nae bescre-
ven als Johan Campinge, Tydeman Avynge, Henrick Brinckinge ende meer gueder lude ghenoech. Ende om mere vestenisse
wille soe heb ick Alberd voirscreven ghebeden heren Johanne mynen soene dessen breeff voir my toe besegelen. Ende ick Johannes preister
voirgenoemt om bedewillen myns vaders ende mede voir my selven, want my dyt belevet ende toe ghestaen hebbe soe
heb ick myn segel beneden aen dessen breeff ghehangen. Sunder argelist. Gegeven ind jair onss heren dusent veerhundert
ende sevenendevyfftich opp sunte Jacobs dach dess hilligen apostels.

x

x

Archief	Drents Archief
Fonds	Arch. Abdij Assen
Inventarisnr.	9
Regestnr.	66
Jaar	1457
Datumcode	Jacobi

x

x

Commentaar	Het zegel is verloren.

x

Materiaal	perkament
Afmeting (mm)	235/9

x