Dutmer Renghers, hovelink, Hermen Hovinge, Roleff Bavinck en Henrick Hiddinc bepalen, als scheidslieden in het geschil tussen de abdis van Assen met de buren van Duerse en Roleff van Elevelde, Bartolt en Frederick, dat de buren van Duerse en van Elevelde "ghene verscheydene marke (solen) hebben mit malkanderen ende solen drijven ende weyden", gelijk gemene buren plegen te doen in Drenthe.

In den jaer ons heren dusent vierhundert ende verentachtentich hebbe wij Dutmer Renghers, hovelinc, Hermen Hovinge, Roleff Bavinck,
Henrick Hiddinc alse ghesatte dedingeslude ghededinget als tusschen der Erber vrouwen Reynalt Jarghs, abdisse des cloesters
van Assen mitten Duerser buer an de ene sijt ende Roleff van Elevelde, Bartolt ende Frederick an de ander sijt alse van scelinge se
mit malkanderen hadden van oer marke daer se in den tiden oneens mede weren, so hebbe wij se verliket, eens ghemaket ende
se hebben ons in beiden perten ghebeden dat wij hem daer bezegelde breve van gheven willen, als wij dedinget hebben ende
woe se oer marke mit malkanderen bruken solen, omme des willen se gheen meer twidracht tot enigen tiden hebben en solen.
In \'t eerste hebbe wij een uutsprake gedaen na maneren als voers. is dat de buer van Duerse ende de van Elevelde en solen ghene
verscheydene marke hebben mit malkanderen ende solen dryven ende weyden de een mit den anderen als ander ghemene buer
oer marke plegen mit malkanderen to bruken in den lande van Drenthe ende nement en sal den anderen scade doen an
saede
off in maede ende onbekortet na inholt des breves ende want dit aldus gescheen is ende tot ewigen tiden dus wesen sal in den
se ghene nie vorwerde en maken so heb wy Hermen Roloff ende Henrick voerscreven ghebeden den Erberen man Dutmer Renghers
hovelinck desen breeff voer ons to bezeghelen ende ick Dutmer voerscreven omme bede willen der gueder manne voerscreven ende want
ick selven oeck een dedinges man mede bin so hebbe ick myn zeghel an dessen breeff ghehangen in den jaer als voerscreven is
des saterdages na den hilligen sacramente.

x

x

Archief	Drents Archief
Fonds	Arch. Abdij Assen
Inventarisnr.	30
Regestnr.	100
Jaar	1484
Datumcode	SpSacram

x

x

Commentaar	Het zegel van D. R. is verloren.

x

Materiaal	perkament
Afmeting (mm)	220/120

x