Burgemeesteren en raad in Groningen verklaren, dat Garmet Allema en Mr. Henrick ter Bruggen hebben gescheiden de nalatenschap van Mene Alma, Gharmets broer, en diens vrouw Abele, Henricks zus, waarbij: 1. Mr. Henrick ontving de helft van het huis c.a. door Mene bewoond, in de Botteringestrate, alle goederen door Abele bij huwelijk aangebracht en 100 Arnems guldens; 2. Garmet ontving alle goederen door Mene bij huwelijk aangebracht; terwijl partijen zullen delen alle roerende goederen staande huwelijk verkregen en alle (genoemde) inschulden van Mene.

Wy Borgermestere ende raed in Groningen betugen myt dessen openen breve dat voer ons sint gekomen Garmet Allema up de ene ende mester
Henrick ter Bruggen up de andere zyden ende bekanden vor em ende oeren erffgenamen dat se in sceydinge der erffnissen ende nagelatenen guderen sali-
gen Menen Alma, Gharmets vorscreven broder ende saligen Abelen, Menens vorscreven echte wyff ende mester Henrix vorscreven suster overgekomen
ende vordragen sint in nagescreven maneren: Inden eersten sall mester Henrick vorscreven hebben de helffte van den huuse mytter hofstede, kelder
ende anders syn to behoeren achter ende voer daer Mene vorscreven plach in toe wonen gelegen in Botteringestrate ende daer toe oeck alle de
guderen de salige Abele vorscreven an Menen vorgenoemd gebracht hefft repplick ende onrepplick, golt, sylver, gemuntet ende ongemuntet, huus-
reesscap ende clenoden gene daer van uutgenomen. Item, daer toe sall mester Henrick vorscreven oec hebben hundert arnemsen gulden vyff olde
jagers offte payment dat daer guet voer is voer den gulden gerekent. Hyr en tegen sall Garmet vorscreven hebben ende ontfangen
alle alsodane guderen repplick ende onrepplick, golt, sylver, gemuntet ende ongemuntet ende andere clenoden, huussresscap ende tylbar
guderen als Mene vorscreven an Abelen vorgenoemd oeck gebracht mach hebben. Item, alle alsodane tylbar guderen als Mene ende Abele
vorscreven samentlike toe gewonnen mogen hebben golt, sylver, gemuntet ende ongemuntet, huussresscap ende andere clenoden solen de vorscreven
parten myt malkanderen halff ende halff delen. Item, alle alsodane schuldt als men menen schuldich is gewest solen de voerscreven
parten oeck halff ende halff delen naemptlick in den eer-sten achte hundert rynsen gulden de onse stad Menen vorscreven schuldich
is gewest. Item, hundert rynsen gulden de Louwe van Wesele Menen vorscreven schuldich is gewest. Item, noch soventich rynsen gulden
de Henrick Langenborch Menen vorscreven schuldich was. Item, tsoventich rynsen gulden de Borchert Yohanszoen Menen schuldich
was, so Mene vorscreven dat in syn uuterste bekent hefft. Item, achte rynsen gulden de Geert Helt schuldich is daer een pant voer
staet. Ende hyr mede solen de vorscreven parten guetliken myt malkanderen vordragen ende vorliket bliven als van sceidinge der
vorscreven erffnissen so de vorscreven parten dat oeck voer ons belevet ende bekant hebben. Mede bekanden oeck de vorscreven parten dat
se in vorgescreven maneren van malkanderen gude sceidinge, overwisinge ende overleveringe der vorscreven erffnissen ende guderen
so ontfangen hebben dat se malkanderen des gansliken bedanken ende des wall toe vreden sint. Ende schelden daer up vor
em ende oeren erffgenamen malkanderen gans vry ende quyt van wegen der vorscreven erffnissen, so dat se noch oere erffgenamen tot ghenen
tyden, myt genen rechte geestlick, noch warlick enige meer ansprake up malkanderen van wegen der vorscreven erffnis-sen ende
guderen doen offte beholden solen mogen. Men solen hyr mede voer oere beider erffgenamen van wegen der selven guderen ende
erffnissen voert meer tot ewigen dagen gesceiden wesen ende bliven sunder all argelist. Dat orkonde wy myt onser stadt
segel. Ghegeven inden jaer ons heren dusent vyffhundert ende ene up sunte Lebuinusdach doe Hermen Lewe, Johan Scaffer,
Ludeken Hoerneken ende Coerd Conrades Borgermestere waeren onser stadt.

x

x

Archief	Drents Archief
Fonds	Arch. Abdij Assen
Inventarisnr.	51
Regestnr.	117
Jaar	1501
Datumcode	Lebuin

x

x

Commentaar	Het stadszegel is verloren.

x

Materiaal	perkament
Afmeting (mm)	250/160

x